De Vacas homenaxea as 'divas' da música

De Vacas inaugurou esta quinta feira en Compostela a súa nova xira que, co nome de ‘Rebovina Divas Live’, busca render unha homenaxe a grandes voces femininas da música pop mundial como Whitney Houston, Celine Dion, Rosalía ou Shakira. De Vacas: Tour vacanal 2019 Sobre o escenario da Sala Capitol estiveron Inés Salvado, Faia Díaz, Paula Romero e Guillerme Fernández que, co seu humor e estilo característicos, foron quen de introducir o himno galego na que fora a banda sonora da película O escolta, con Whitney Houston e Kevin Costner, ou relacionar o tema principal de Titanic, o filme de James Cameron que contou coa inconfundíbel voz de Celine Dion, co afundimento do Prestige. A idea das ‘divas’ Faia Díaz explica a Nós Diario que a idea xurdiu de maneira natural e moi emocional. “Levamos oito anos xuntas facendo versións dos temas que non gustan do pop e cadramos en que os que máis nos emocionaban eran os que estaban vinculados ás grandes voces femininas”, sinala, “pensamos que esas cancións tiñan que ser o centro do novo espectáculo”, engade. Contaban ao seu favor con que había “moito material” e comezaron a escolla. “Como en calquera labor, o que mostramos é unha pequena parte do que traballamos”, recoñece a cantante. O proceso non foi sinxelo. De maneira “colectiva” crearon os textos que aplicaron despois na música seleccionada. “Ás veces centrámonos no que queremos contar e outras nin partimos dunha idea predeterminada, gústanos esbardallar, se cadra é a palabra que mellor define a nosa poesía”, admite a compoñente de De Vacas, “da mesma maneira tivemos situacións nas que a letra sae rápido e outras pasamos moito tempo con ela”, agrega. Concerto de De Vacas en Pontevedra O guitarra do grupo, Guillerme Fernández, apunta a Nós Diario que quixeron dar continuidade ao proxecto cun repertorio que recuncara “nos elementos comúns aos traballos realizados con anterioridade, con reivindicación, irreverencia, feminismo e humor”. Sobre os temas que entran no espectáculo quixeron adaptar pezas “non só do pasado senón tamén do presente”. Para conseguir un resultado satisfactorio tiveron que desprenderse do “envoltorio comercial” das cancións para conseguir que pasaran a ser interpretadas coas voces e a guitarra do formato que ten De Vacas. Nova escenografía e colaboracións A escenografía e as colaboracións foi outro dos elementos que mudaron para esta nova xira de De Vacas durante este ano. "No vestiario colaboraron Misha Millinery, A Maranha e Los alfileres de Elia", explica Faia Díaz, "e na escenografía Bieito Miranda, todas amizades", indica. Unha proba foi o concerto compostelán no que, contando con que era a “estrea”, quixeron facer algo “especial, sabendo que, ademais, estabamos na casa”. Por este motivo tiveron a colaboración dos músicos Carlos Abraira e Roberto Rama, acompañando coas gaitas a súa versión do himno galego. Tamén subiu ao escenario o cuarteto de corda Suelen estar e o gaiteiro Xosé Manuel Budiño para interpretar a peza Titanic Nunca Máis. Non faltou o coro Encaixe, de Santiago, “do que forman parte Inés, Faia e Paula”. “En principio son colaboracións puntuais, non é algo permanente, pensamos nos videoclips e en como se faría a canción nun directo mais, como contas coa técnica, fomos máis alá”, indica Guillerme Fernández. Faia Díaz e Vero Rilo levan 'Por unha peseta' a Outeiro de Rei Para os dous temas consideraron “máis acaído as gaitas para o himno e no tema do Titanic un cuarteto de corda”. Faia Díaz admite que lle deron “unha volta á escenografía, é a primeira vez que a construímos para a ocasión e facémolo tamén co vestiario, mesmo introducimos un deseño de son e de luces específico para esta xira". A música nos concertos... e nas redes sociais Despois da estrea na Sala Capitol de Santiago de Compostela a xira continuará, con datas xa confirmadas, o día 30 de xuño no Asalto ao Castelo en Vimianzo (Terra de Soneira), e o 9 de xullo na Festa do chourizo ao viño de Ortoño, en Ames (comarca de Santiago). Alén dos concertos, quen queira escoitar os novos temas de De Vacas terá que pasarse por algunha das súas redes sociais. “Desde o inicio do grupo comezamos contando con elas para difundir o noso traballo e practicamente toda a nosa música está dispoñíbel en YouTube, Facebook, Twitter ou noutras”, admite o guitarrista Guillerme Fernández. De Vacas, a(s) Rosalía(s) e a Revolta Feminista do 8M “Non nos propuxemos o formato disco, a inercia levounos por outro lado, mais non nos fechamos nun futuro a facelo, iso si nas actuacións contamos agora con USB personalizados onde incluímos material extra para quen o queira mercar”, conclúe.