O filme María Solinha recuperará a figura dunha muller perseguida polo poder político e a Igrexa após desafiar o sistema estabelecido. O director galego Ignacio Vilar anunciou o inicio da rodaxe para o día 19 de agosto e alongarase até o 20 de setembro.
Volve así dirixir Ignacio Vilar, creador doutras longametraxes como Sicixia (2016), A Esmorga (2014), Vilamor (2012) ou Pradolongo (2008), con grandes éxitos entre o público da Galiza enteira e parte do estranxeiro amosando que si é posíbel e necesario facer un cinema popular que nace da cultura e da lingua propias.
"A María Solinha do século XVI e a do século XXI foron atacadas polo mesmo dragón", afirmou Vilar
O director, que anunciou o inicio da rodaxe desde a Deputación de Pontevedra, non quixo avanzar moitos detalles da película mais si afirmou que "a María Solinha do século XVI e a do século XXI foron atacadas polo mesmo dragón", en referencia a unha lenda sobre a que se celebra a Festa da Coca en Redondela, un dos enclaves onde se rodará, e que conta como un dragón que secuestraba mulleres para violalas foi finalmente derrotado polo pobo. Cangas e a Illa de Toralla serán outros dos escenarios.
A protagonista será Grial Montes, alumna da Escola Superior de Arte Dramática de Vigo
A protagonista será Grial Montes, alumna da Escola Superior de Arte Dramática de Vigo, quen reivindicou durante a presentación máis protagonistas mulleres no cinema. O elenco de actores tamén o compoñen Santi Prego, marido de Solinha, e Antonio Durán ‘Morris’, no papel de inquisidor. A protagonista salientou o feito de interpretar "unha muller que permaneceu oculta e da que non se coñece a súa historia” para axudar a difundila.
Carmela Silva, presidenta da Deputación de Pontevedra, participou do acto de presentación do filme, en nome da entidade provincial que é colaboradora da rodaxe, e salientou que Solinha é unha desas mulleres invisibilizadas e silenciadas na historia, un exemplo da persecución que sufriron mulleres ao longo da historia por querer ser libres, sabias e rebelarse para ocupar o espazo que lles correspondía. O deputado de Cultura e Lingua, Xosé Leal, quen tamén participou da presentación da rodaxe do filme, agradeceu a Vilar "o seu compromiso coa lingua galega nas súas películas".
Quen foi María Solinha?
María Solinha viviu en Cangas entre os séculos XVI e XVII. Foi condenada pola Inquisición acusada de practicar a bruxaría e a sentenza consistiu en despoxala dos seus bens e do chamado “dereito de presentación” en dúas igrexas do lugar.
Este dereito, que recibira tras a morte do seu home Pedro Barba, dáballe unha porcentaxe do gaño dos templos e poder para decidir quen mandaría nos mesmos.
Solinha converteuse nun mito, nun símbolo do pobo, e protagonizou cancións e poemas.
