The Homens volven xuntarse dous anos despois para un concerto xunto a Samesugas

Ao tempo que dous dos seus principais compoñentes camiñan cara adiante co seu novo proxecto, Grampoder, dando os seus primeiros pasos e con disco xa na rúa, a banda máis relevante do power pop do país e un dos puntais do rock galego da pasada década e mesmo principios da actual volve subirse a un escenario dous anos despois da súa última aparición. The Homens regresan cun concerto puntual que terá lugar o sábado 27 de Xullo na sala Zona C de Compostela, nunha sesión vermú a iso do mediodía en plenas Festas do Apóstolo e nun evento no que tamén participará outro grupo mítico do punk e o garage de Galiza, Samesugas. 

Segundo os propios The Homens, tocarán en formato de trío e basearán o concerto sobre todo en temas da primeira época. “Levamos un par de ensaios e as sensacións son moi boas. Fáltanos ritmo de partido, esquecéronnos algunhas letras e xa non recordábamos como zumban os ouvidos despois dun entreno dos Homens. En fin, nada grave. Esperámosvos”, afirma a banda na súa web.