Teatro

O Teatro Principal de Ourense cancela os abonos de tempada

Ante a restrición da capacidade a 60 persoas mesmo en espazos destinados a acoller 1.000 persoas, o auditorio vese na obriga de vender os billetes para espectáculos individuais.

Teatro Principal de Ourense.
photo_camera Teatro Principal de Ourense.

Os límites de capacidade especialmente restritivos dos espazos culturais impostos pola Xunta da Galiza en determinadas áreas de risco son a causa de que o Teatro Principal de Ourense, que iniciou onte a programación do resto do ano coa obra teatral La fiesta del chivo, dirixida por Carlos Saura, decidise devolver os abonos de tempada ás persoas usuarias.

A idea é iniciar de novo un proceso de venda de entradas único para cada espectáculo, coa restrición actual ditada pola Consellaría de Sanidade dun máximo de 60 persoas no público por representación, o que rolda tan só 15% da súa capacidade.

Esta posibilidade xa se anticipaba hai uns días no marco destas medidas, que xa tiveron consecuencias análogas noutros grandes recintos de Santiago e Coruña, como o Teatro Colón e o Auditorio da Galiza, que tamén fixan en 60 asistentes o tope malia teren capacidade próxima a 1.000 butacas.

Escena Galega protesta

A asociación sectorial Escena Galega xa fixo público esta semana mediante un comunicado a súa preocupación e incomprensión ante uns criterios especialmente duros cos espazos escénicos, que non teñen en conta as capacidades totais destes e non teñen equiparación coas decisións tomadas en ningún outro lugar.

Ante esta situación, non se descarta que algúns espectáculos vexan alterada a súa continuidade.

Segundo un comunicado desde a dirección do teatro de Ourense afirman estar a traballar para que "o máis axiña posíbel", seguindo as  indicacións de vicepresidencia , se poidan "pór á venda as entradas para os espectáculos programados".

Comentarios