A Rede Galega de Teatros e Auditorios (RGTA) da Xunta da Galiza ofrececerá 12 actuacións escénicas en Compostela durante este semestre. Delas, 11 son funcións teatrais de seis espectáculos e unha, de danza.
A programación deste circuíto cultural terá lugar no Teatro Principal, en colaboración co Concello, e comezará esta sexta feira ás 20.30 horas co espectáculo El dios del pop, a cargo de Diego Anido. Esta peza repetirá función o sábado 22.
A programación continúa a fin de semana seguinte con Cigarreiras, de Contraproducións, e dirixida por Cándido Pazó, con sesións a sexta e o sábado ás 20.30 horas. A proposta está baseada na novela A tribuna, de Emilia Pardo Bazán e conta con sete actrices sobre o escenario.
Xa en febreiro, os días 3 e 4, Sarabela Teatro será a encargada de iniciar as actuacións do mes co seu espectáculo Morgana en Esmelle, a adaptación da novela homónima de Begoña Caamaño.
Dúas semanas máis tarde, os días 17 e 18 de febreiro, Ibuprofeno Teatro representará Smoke in the water, mentres que o domingo 19 será a quenda de Pérez&Fernández coa coprodución do Centro Dramático Galego (CDG) Os nenos da varíola, ás 18,30 horas.
En marzo, está prevista para os días 4 e 5 a representación da nova coprodución do CDG Rastros, da compañía Condetrespés. O cartel féchase o 20 de maio coa danza de Fran Sieira e o espectáculo De Mente.
329 funcións e 40 espazos
Desde a Xunta lembran nun comunicado que a RGTA ofrece nesta período accións culturais en 40 dos seus espazos asociados. Sumarán así 329 funcións escénicas de 128 formacións, "gran parte delas, galegas". Entre xaneiro e xuño exhibiranse 159 propostas diferentes de teatro, música, danza, maxia e novo circo.
