As “teatreiras” mes a mes na Axenda Feminista do Observatorio

Despois das músicas e as escritoras, son as mulleres do teatro as que conducirán o ano a través da Axenda Feminista do Observatorio da Mariña pola Igualdade. Doce directoras e actrices serán as protagonistas de cada un dos meses do próximo 2014. 

photo_camera

Pilar Pereira, Ánxeles Cuña, Cristina Domínguez, Isabel Risco, Mónica Camaño, Anxela G. Abalo, María Armesto, Patricia de Lorenzo, Paula Carballeira, Anabel Gago, Iria Sobrado e a mariñá Comba Campoy son as “teatreiras” protagonistas da axenda do próximo ano do Observatorio da Mariña pola Igualdade. Da mesma maneira que en anos anteriores, o colectivo feminista mariñá busca coa publicación da súa axenda dar visibilidade ao traballo das mulleres en distintos ámbitos, neste caso, da cultura. Primeiro as músicas e logo as escritoras, son agora as “teatreiras” as que toman os meses para descubrir o seu traballo, tanto na dirección como na interpretación. 

O xoves 5 de decembro a axenda presentarase na libraría Lila de Liith ás 20.00 horas en Compostela coa presenza de Paula Carballeira, Anxela Abalo, Iria Sobrado, Anabel Gago, María Armesto, Mónica Camaño e Pilar Pereira.O sábado 7, a presentación será na Casa das Letras en Ribadeo, coa presenza da actriz da Mariña, Comba Campoy. 

Visibilizar as mulleres na cultura

A Axenda Feminista naceu por vez primeira no ano 2011 coas reivindicacións pendentes para a igualdade das mulleres. Pasaría despois a “visibilizar” durante tres anos, este incluído, o papel das mulleres nos distintos ámbitos da cultura. A lenda “Non nacín para ser domesticada…” de Carolina Otero ademais da figura mitolóxica da Medea deseñada pola ribadense Chenchu López compoñen o pórtico da publicación. Singular é tamén que durante todo o ano aparezan sinaladas as datas principais do movemento feminista, tantas veces esquecidas.

“Porque sobranceiro é o papel das mulleres no desenvolvemento e profesionalización do teatro galego. E porque queremos continuar a nosa porfía de visibilizarmos e valorizarmos o traballo das mulleres galegas en distintas facetas do eido cultural” son as razóns para que o Observatorio da Mariña pola Igualdade desenvolva esta homenaxe ás teatreiras. 

Unha imaxe de cada unha das mulleres máis un texto escrito expresamente para a axenda acompaña cada un dos meses nos que directoras e intérpretes reivindicarán o papel do seu xénero no teatro desde a nova Axenda Feminista.  

Comentarios