Este congreso pretende actualizar estudos previos e fornecer un marco de análise e debate sobre a súa significación na evolución do pensamento, das ciencias, da literatura e das artes de Galiza, así como a súa incidencia na dinámica política dun período en que as tensións nacionais e a conflitividade socio-política adquiren unha especial relevancia no seo do Estado español.
O simposio acollerá oito relatorios de especialistas e tamén 46 comunicacións, ademais dun concerto e unha sesión dedicada á análise comparativa con outros especialistas doutros territorios do Estado: Alejandro Quiroga (España), Jordi Casassas (Cataluña) e Joseba Agirreazkuenaga (Euskadi).
Os relatorios serán impartidos por Justo Beramendi (Ideoloxías e Programas), Xosé Carlos Garrido (Organización e Acción Política), Laura Tato (Lingua, Literatura e Medios de Comunicación), Manuel Roca (Economía e Sociedade), Pilar García Negro (A cuestión de xénero nas Irmandades), Xosé Manuel González Reboredo (Ciencias), María Victoria Carballo-Calero (Artes Plásticas e Música) e Xosé Estévez (Relacións Exteriores).
Na noite da sexta (19 de novembro) terá lugar no Auditorio de Galicia un concerto “Tres Estampas Galegas”, con texto de Leandro Carré e música de Mauricio Farto, coa participación do Coro Gaos e unha orquestra de vento, ademais dos intérpretes Alba López, M. José Ladra e David G. Piñeiro.
