Sicixia vaise proxectar esta fin de semana en 6 salas comerciais galegas e nunha do resto do Estado. En concreto son as seguintes: Os Cantóns e As Roseiras, A Coruña; Xunqueira, Cee; Cines Compostela e As Cancelas, Santiago; Abella, Lugo; Aragó Cinema, Valéncia.
Catro semanas de permanencia en cartaz non está á alcance de calquera filme nun contexto tan marcadademente competitivo como a exhibición cinematográfica e de facto a última fita de Vilar non só compite, senón que mesmo se impón nalgunhas salas a criaturas de Hollywood como Aliados, con Brad Pitt e Marion Cotillard como reclamos, e tamén a La Reina de España, o retorno de Fernando Trueba detrás da cámara con Penélope Cruz como estrela.
O galego non só mostra a súa rentabilidade comercial no país, senón que mesmo fóra, sintomaticamente nos Països Catalans, especialmente sensíbeis á realidade plurinacional e plurilingüe do Estado, mantense en cartaz após catro semanas, nunha sala de Valéncia. Vía Láctea Films, produtora da fita, entende que isto demostra que "o idioma non é barreira, senón un elemento fundamental, para compartir con espectadores alleos á nosa cultura a riqueza do noso patrimonio".
Nota de Sermos: Esta noticia foi emendada ás 13.53 horas porque por un erro, na primeira versión desta noticia, se deu conta de que o filme se mantiña tamén en cartaz nun cinema de Barcelona.
