CULTURA
O país dos mil festivais
Ses e a súa canción combativa de autora será o prato forte da sexta feira. A coruñesa prodígase este verán polos palcos do país. Hai uns meses editou o seu último disco, Readmirando a condición, en que volve sobre o seu debut e engade un inédito. As súas actuacións, como puido comprobarse no pasado Festigal, enchen prazas e festivais.
O ensemble de percusión tradicional Pelepau -con sede en Vigo-, a irlandesa Niamh Ní Charra, e os seus compatriotas Fatty Farmers -este fusionan o irlandesismo con country, punk oun música balcánica, se cadra no esteiro dos Pogues- completan o cartaz da primeira xornada da Carballeira.
O segundo día comeza antes. Concretamete, ás dúas do mediodía cunha sesión vermú amenizada polo preciosista folk pop de Caxade, o home orquestra Cé Orquestra Pantasma e o repertorio tradicional dos Farrapos. Á noite -a partir das nove e media-, unha nova sesión de músicas galegas e foráneas coa conexión celta como nexo.
Xabier Díaz e as Adufeiras de Salitre abrirán o escenario e presentarán Noró (2018), de subtítulo “algunhas músicas do norte”. Seguirán unha das curiosidades do festival, Harmonica Creams. Xaponeses, armadaos de violín, harmónica, guitarra e percusión, practican o que chaman celtic blues. Seguirán os escoceses Mànran. E pechará un grupo á marxe das sonoridades máis ben folk que dominarán a Carballeira: Astarot.
A banda de Cangas, fundada en 1983, foi pioneira do heavy metal galego. Adaptaron textos de autores canónicas da literatura galega como letras para o seu rock duro e de guitarras. A súa última incursión en estudio foi acompañados dunha orquestra e coa colaboración de Alberto Cereijo, héroe da guitarra de Los Suaves.
