Como previa ao número monográfico do sábado día 13 dedicado ao coronavirus, esta semana Sermos Galiza abre cunha coidada reportaxe de Manuel Xestoso sobre a muller. En 'Mulleres en acción. Vinte anos de pensamento e acción feminista', o xornalista repasa a evolución dese foro que xurdiu da Mostra de Teatro Cómico e Festivo decorrida en Cangas hai xa dúas décadas.
Tamén como antesala do 8M, María Reimóndez protagoniza a entrevista da semana. Nunha peza asinada por Montse Dopico -e con fotografía de Mark Zlick, da AELG-, baixo o título 'María Reimóndez. Nomear a ex-centricidade', a autora fala de Cobiza (Xerais), unha novela coa que logrou levar o I Premio Literario Pinto e Maragota.
Na obra fala de temas como a diversidade sexual e de cuestións de xénero.
Pola súa banda, Iago Valverde fala de 'Ansede Quintáns. Diálogo do posíbel' no espazo destinado á arquitectura, no que intenta analizar un traballo "difícil de definir" pero moi chamativo á vista.
Nesta ocasión o Andar e Ver, a cargo do Colectivo Xea -Adela Leiro, Mon Daporta e Xan Colazo- decide ir 'De Sanxenxo a Areas' ao tempo que a Consellaría de Sanidade anuncia o levantamento dos fechamentos perimetrais na meirande parte dos concellos, polo que as axendas empezan a botar fume.
Como non podía ser doutra forma, os libros tamén son unha parte fundamental do semanario. Deles falan Mario Regueira e Inma Otero Varela e, en paralelo, atoparás críticas musicais de Mario Vilariño e Carlos Penela. Andrés Castro volve, como cada sábado, coa súa visión do cinema.
Pasado o entroido, Anxo Fole fai a súa proposta de menú para este tempo no apartado de cociña. E por se os ingredientes non eran suficientes, rematamos cos pasatempos creados por Xerardo R. Roca e Xoán Costa.
Para gozar de todos estes contidos non tes máis que acudir ao teu quiosque ou á nosa lonxa en liña e adquirir o Sermos que acompaña ao Nós de mañá. Non perdas máis tempo para ter contidos en exclusiva e fai canto antes a túa subscrición!
