As cinco principais asociacións do sector do libro galego (Asociación Galega de Editoras, Asociación Galega de Profesionais da Ilustración, Asociación Galega de Profesionais da Tradución e Interpretación, Federación de Librarías de Galicia e Asociación de Escritores e Escritoras en Lingua Galega) emitiron esta terza feira un comunicado para anunciar que non asistirán ao Consello Asesor do Libro convocado pola Consellaría de Cultura e Educación para o vindeiro 15 de xullo.
As asociacións consideran "que o desenvolvemento das xuntanzas deste Consello Asesor non está a ser útil para o noso sector, pois nelas non se vehiculan solucións ou saídas aos principais problemas que afectan ao mundo do libro galego", segundo di o comunicado.
Henrique Alvarellos, presidente da Asociación Galega de Editores, comenta en declaracións a Nós Diario que o malestar no sector vén de antigo. "As reunións son inertes desde o punto de vista do debate. A Xunta limítase a transmitir as súas decisións buscando asentimento e as actas non reflicten as propostas que as asociacións someten a discusión. Consideramos que o Consello é un organismo imprescindíbel, mais ten que ser máis dinámico, máis dialogante, para que teña utilidade. O que pedimos é outra actitude na escoita dos que somos protagonistas da edición".
Diálogo real
Iria Taibo, da Asociación Galega de Profesionais da Tradución e Interpretación, coincide en que o principal problema é a falta de diálogo. "Un consello asesor debe discutir diferentes propostas, estabelecer un diálogo real, e iso non se dá nestas reunións", declara a Nós Diario.
"A Administración, sinxelamente, non nos escoita, limítase a anunciar as súas decisións. Non lle estamos pedindo á Consellaría que acepte todas as nosas suxestións, mais si que polo menos as teña en conta á hora de tomar medidas, que inicie un debate que resulte produtivo para o sector. Por iso consideramos que se o que nós propomos non vai ter ningunha consecuencia, a nosa presenza non ten sentido".
Por outra parte, todas as asociacións coinciden en que "o Consello Asesor, cuxa creación foi unha demanda histórica do sector e e que emana Lei do Libro de 2006, é un organismo imprescindíbel onde abordar as principais liñas de traballo e de futuro para o libro galego".
