Un mundo é o novo traballo que os composteláns Ruxe Ruxe traen baixo do brazo. 14 trallazos que amosan como a banda segue a sentirse moi cómoda dentro do punk rock guitarreiro e festivo como se dos fillos galegos dos Clash se tratara.
O tema de apertura do disco, "Soños", comeza rítmicamente forte, convidando a bailar e coa letra cun convite a vivir sen medo e con optimismo, tónica que se repetirá ao longo do disco. Continúa con "Beizos", unha oda ao poder dos bicos e do amor cun riff sinxelo pero que engancha e fai que funcione. Fica así o camiño marcado para chegar e ficar "Na miña taberna", un himno tabernario e festivo co que máis de un vaise sentir identificado.
"Refachos" é un medio tempo máis escuro, tanto musical como na súa letra que colle desta vez unha vía máis lírica e profunda, que contrasta con "Respiro", un ska que volve subir o ánimo e recupera o ton optimista nas letras e o ritmo nos pés. "Cancións ceibes" é o que nos agasallan Ruxe Ruxe, sendo conscientes das moitas historias que aínda quedan por contar. Sabedores de que non todas son fermosas, que moitas están cheas de erros e tristuras que fan que teñamos que roubar "Frores" para vivir.
O campo da festa faise punk en "Ven bailar", un divertimento en forma de cantiga tan intenso como festeiro. E é que nótase que son da "Vella escola", de licor e rock and roll e viven nun mundo "Perfecto", entre cerdeiras e laranxeiras, sen defectos nen reloxos. "Nada máis" que optimismo reflicte esta repichoca, cun tempo lento preciso para crear un ambiente axeitado para cantar o fermoso que todo é.
Un moi bo traballo dunha banda que após de 19 anos segue agasallándonos bo rock como o primeiro día, contribuíndo a creación dese mundo perfecto.
"A máquina" é outro tema festeiro con base de ska que volve chamar de novo a desfrutar das cousas boas da vida e cumprir os soños, para pasar a sintonizar "Radio Xabral" un tema guitarreiro onde convidan a bailar homenaxeando na súa letra as súas influencias vitais e musicais como Ramones, Celso Emilio Ferreiro, a liberdade, a rebeldía ou garitos como o Bartolo, para pechar con "Un mundo feliz", un medio tempo de letra utópica onde dan a visión do mundo no que quixeran vivir.
Guitarras, gaitas, ventos, optimismo e punk rock podería ser o resumo deste novo traballo de Ruxe Ruxe. Un moi bo traballo dunha banda que após de 19 anos segue agasallándonos bo rock como o primeiro día, contribuíndo a creación dese mundo perfecto.
Listaxe de temas
- Soños
- Beizos
- Na miña taberna
- Refachos
- Respiro
- Cancións ceibes
- Frores
- Ven bailar
- Vella escola
- Perfecto
- Nada máis
- A máquina
- Radio Xabral
- Mundo feliz
Ruxe Ruxe nas redes
Web: www.ruxeruxe.com
Facebook https://facebook.com/ruxeruxe
Twitter: @ruxeruxe