O encontro adoptou a forma de romaría e comeza no Paseo do Carboeiro ás dúas da tarde, na hora do vermú, e remata ás nove da noite. Ademais da oferta gastronómica e concertos, picadiscos amenizarán as esperas.
Power pop, rock steady ou frat rock serán os estilos das catro bandas do Psicotroita. Cachas & Cousins, de Compostela, amosarán op seu dominio do rock steady, primitivo ritmo xamaicano que fixo de ponte entre o ska e o reggae e bebía tamén do rhythm and blues. Despois será a quenda de Oh! Ayatollah, con base en Lugo e unha das bandas galegas últimas de maior proxección: pop enerxético e a súa lírica intensa.
De Reino Unido procede MFC Chicken, banda que se adscribe ao subxénero do frat rock, forma primeiriza de garaxe, bailábel e acelerada, abondosa nos Estados Unidos no inicio dos 60. Tamén británicos son More Kicks, power pop.
A produtora Tremendo Audiovisual e o Concello de Oroso organizan a festa, que conta co patrocinio de Deleite.
