“Non sei se pode haber algo máis feo nesta vida que roubarlle o acordeón a Xurxo Souto”, preguntábase o profesor e divulgador Manuel Gago. “Quen pode ser tan ruín para roubarlle o acordeón a Xurxo Souto?”, salienta o cineasta Alfonso Pato.
“Devolvede o Castagnari, por favor! Non é un acordeón, é unha máquina de facer medrar o país e levar felicidade a quen o escoita, mais non vos enganedes, é máxico e non vai funcionar noutras mans que non sexan as de Xurxo”, advirte a artista Viki Ribadulla... son ducias as reaccións de destacados nomes da cultura que se solidarizan con Xurxo Souto, a quen roubaron o seu acordeón.
Aconteceu no barrio coruñés do Ventorrillo, a pasada segunda feira, e subtraéronllo do seu coche. “Non ten moito valor pero téñolle un cariño inmenso”, escribía o propio músico nas súas redes sociais. “Por favor, se o vedes, avisádeme e dicídelle que mo devolva -non son unha persoa rancorosa- a quen mo levou”, exhortaba Xurxo Souto.
"Foi unha pequena casualidade, tíñao no coche, na maleta, parei un momentiño e deixei a porta aberta, alguén mo levou, e foi un despiste porque deixou un paraugas", explica, en conversa con Nós Diario. "Que mo devolva no barrio, que alí coñecémonos todos, e eu doulle o seu paraugas, así ficamos todos contentos", di.
O Castagnari do músico é o suficientemente recoñecíbel para que non pase desapercibido, pois é o único destas características -sen a tapa que cobre as notas da melodía- na contorna da Coruña. O acordeón é diatónico, "moi humilde", mais "un compañeiro sentimental moi importante para min". Leva con Xurxo Souto máis de 20 anos, após comprarllo a Manuel Cociña, de Perlío, "a quen eu chamo o 'doutor do acordeón', porque é un sabio que navegou todos os mares do mundo, e a xente da terra somos o centro do mar con música do acordeón", engade.
Xurxo Souto atópase "sorprendidísimo" polo "tsunami de cariño que estou a recibir estes días", "emocióname sentir tanto cariño da rede de amizades grandes que teño, e isto, máis unha vez, demostra a nosa condición de pobo de artistas".
Amósase seguro de que aparecerá e promete "unha festa moi bonita" cando recupere o seu instrumento.
