O Resurrection Fest Estrella Galicia decidiu adiar a súa edición deste ano a 2022 ante a situación actual pola pandemia do coronavirus, do mesmo modo que ocorreu en 2020 coa suspensión do festival.
Así, a 15ª edición do Resurrection Fest realizarase do 29 de xuño ao 2 de xullo de 2022, na fin de semana habitual dos últimos anos.
"Afortunadamente, cremos que esta será a definitiva, xa que por fin vese a luz ao final do túnel grazas á vacinación masiva e esperamos que nos próximos meses volvamos á normalidade", valora a organización nun comunicado.
Sobre o cartaz de 2022, avanza que será "moi bo", no que se manterán "moitísimas" bandas e haberá "novas sorpresas". "Será un dos mellores carteis que xamais tivemos, e esperamos anuncialo proximamente". A organización lamenta que a suspensión do festival durante dous anos producira "perdas millonarias e de moitos postos de traballo", case 4.000 entre directos e indirectos, afirma.
Devolución de entradas
Igualmente, todas as entradas para o festival (abonos, Resucamp, viaxes) serán válidas o ano que vén sen necesidade de facer nada.
Así, o festival chama a que se garden as entradas para poder "seguir adiante con forza e facer a edición máis épica" da súa historia. Agradece que o ano pasado as devolucións fosen "mínimas".
Dado que as entradas están esgotadas, o festival explica que habilitará proximamente unha plataforma para revender eticamente e de maneira segura os pases a algún amigo ou familiar, ademais de poder tramitar a devolución da entrada sen problema. "Vémonos en Viveiro!", conclúe a organización.
