Cando chega un novo disco de Reincidentes, sempre é un momento especial. Sen dúbida é dos discos que menos tardo en darlle ao play e poucas veces me deixan indiferente. Neste traballo voltan a demostrar que son unha banda lonxeva ao tempo que actual, pois a xente sempre agarda deles temas novos en vez de reclamar unicamente clásicos. Obviamente composicións como Vicio ou Jartos de Aguantar, son clásicos que superan á propia banda, mais iso é algo normal tras 30 anos de carreira.
Terrorrismo foi o single adianto de presentación deste plástico e o elixido para abrir o disco. Un tema sobre as continuas condenas por enaltecemento do terrorismo, que tanto proliferan ultimamente contra aqueles que fan uso da súa liberdade de expresión e no que a banda fai un repaso sobre o que o sistema di que é terrorismo e o que para eles realmente o é. Musicalmente leva a marca Reincidentes durante os 13 temas do álbum, que non é outro que a crítica social e o punk rock. A voz de Fernando debulla coa súa forza as historias e reivindicacións dos Reincidendes.
Entre os temas que a banda aborda desta vez, atopamos en Se Acabó la Fiesta ese franquismo que nunca morreu e que continúa hoxe máis vivo que nunca a pesar da morte do ditador. Os abusos sexuais da igrexa son denunciados en La Misa Final. Non se esquecen de Albert Rivera¸ do que deixan moi claro o que pensan en Ciudadano K-K nin de Susana Díez, no bonus track Susana I de Andalucía, a través dunha revisión do clásico de Miliki, nin tampouco dos USA e o sistema capitalista en Agítese antes de U$á.
Quixera destacar dous temas que me chamaron especialmente a atención neste disco. O primeiro deles é Dentro de Ti. Unha canción que sorprende no seu medio tempo e afastamento do punk e o seu achegamento a un rock máis clásico á que lle engaden unha letra de amor e desamor conformando o tema máis inesperado e pode que por iso máis destacábel do álbum. O segundo en destaque é Hermano, unha composición que trata sobre o autismo e que cobra máis forza ao tratarse dun tema autobiográfico, sendo que fala da experiencia do propio Fernando co seu irmán autista.
Un traballo que, agás polo comentado e exactamente o que se agardaba de Reincidentes, que non é outra cousa que o punk rock que levan cultivando estas decadas aderezados coas letras que tratan de espertar conciencias para poder cambiar todo iso que lles produce tanta vergoña.
REINCIDENTES NAS REDES
Web: http://reincidentes-sca.es
Facebook: https://www.facebook.com/Reincidentes.Oficial
Twitter: @reincidentesofi