Desde a sexta feira está a decorrer na finca da Atalaia, en Seixal (Portugal), a Festa do Avante, un evento, cultural, político e social impulsado e organizado pola militancia do Partido Comunista portugués, con milleiros de voluntarios e voluntarias colaborando nas distintas tarefas relacionadas co correcto desenvolvemento do festival.
Considerado como un dos maiores festivais culturais de todo Portugal e un dos maiores eventos que un partido comunista organiza na actualidade en todo o mundo, a Festa do Avante serve como punto de encontro para os movementos comunistas de todo o mundo.
A festa é un grande encontro internacionalista. Participamos nela 53 organizacións políticas de 4 continentes. De Vietnam a Brasil, de USA a China, de Ángola a Irlanda, de Dinamarca a Palestina, de Venezuela ao Sahara, de Mozambique a Timor Leste, de Sao Tomé a Luxemburgo…🌏🌎🌍 pic.twitter.com/UDJSruwa3F
— Rubén Cela (@rubencela) September 4, 2022
O presidente da Fundación Galiza Sempre e membro da Executiva do BNG, Rubén Cela, explica no seu Twitter que “a festa é un grande encontro internacionalista. Participamos nela 53 organizacións políticas de catro continentes. De Vietnam a Brasil, de EUA a China, de Ángola a Irlanda, de Dinamarca a Palestina, de Venezuela ao Sáhara, de Mozambique a Timor Leste, de São Tomé a Luxemburgo…”.
A Galiza tamén aparece representada na Festa do Avante, cunha delegación enviada polo Bloque e Galiza Nova. O noso país faise sentir no encontro “co traballo das compañeiras e compañeiros de Galiza Nova que atenden todas as consultas no stand do Bloque”, que “explican a realidade nacional de Galiza e o proxecto político do nacionalismo galego”.
Espazo de debate político
Cela subliña que “A Festa do Avante é tamén un espazo de debate político, partillamento de análises e reflexións desde unha perspectiva de esquerdas e defensa do dereito de autodeterminación dos pobos e a loita antiimperialista. Debates, palestras, presentacións de libros, encontros internacionais...”.
A @festaavante é tamén un espazo de debate político, partillamento d análises e reflexións desde unha perspectiva de esquerdas e defensa do dereito d autodeterminación dos pobos e a loita antimperialista. Debates, palestras, presentacións de libros, encontros internacionais, etc. pic.twitter.com/f4e9YgvDtw
— Rubén Cela (@rubencela) September 4, 2022
O encontro decorreu por primeira vez en 1976, despois da caída da ditadura salazarista. “De todo o país chegaron visitantes para o que pronto se viu como a maior manifestación político-cultural de Portugal”, explica a organización na páxina web oficial da Festa do Avante.
Trátase do maior evento cultural d todo Portugal. Música, literatura, teatro, cinema, artes plásticas, ciencia, deporte…toda manifestación creativa ten o seu espazo na #festadoavante.
— Rubén Cela (@rubencela) September 4, 2022
Falar da @festaavante é falar de cultura, liberdade de expresión, pensamento e creatividade. pic.twitter.com/UDQpa08ak1
Durante tres días, o festival reúne milleiros de persoas que desfrutan dun programa cheo de actividades musicais, literarias, teatrais, cinematográficas e deportivas, entre outras. “Toda manifestación creativa ten o seu espazo na Festa do Avante”, asegura Rubén Cela.
Porén, para o membro da Executiva do BNG, o que fai poder afirmar que a Festa do Avante “não é um simples festival de música” é un “intanxíbel: o ambiente de camaradaría, amizade, solidariedade que compartes con milleiros de persoas que por tres días ningunha é descoñecida”.