O PSdeG desenvolveu no día de hoxe un acto para lembrar Xela Arias, poeta homenaxeada polo Día das Letras Galegas deste 2021, e para reivindicar un "galeguismo inclusivo" que consiga avances para un idioma que "vai perdendo terreo" como é o galego.
Así o manifestou o secretario xeral dos socialistas galegos, Gonzalo Caballero, nunha homenaxe no Panteón de Galegos Ilustres de Santiago de Compostela, onde estivo acompañado doutros nomes relevantes na formación. Tamén interviñeron o filólogo Anxo Rajó, biógrafo de Xela Arias, e o membro da Real Academia Galega (RAG) e exdeputado Francisco Cerviño.
Durante o principal discurso deste acto, que estivo precedido dunha ofrenda floral a Rosalía de Castro, Caballero reafirmou o "compromiso" do PSdeG-PSOE coa lingua, as letras e a cultura galegas, algo que acompaña ao partido "desde a fundación".
Neste contexto, o secretario xeral do PSdeG alertou de que agora a lingua "vai perdendo terreo" entre a mocidade precisamente "cando máis recursos hai" na educación. "Sen unha lingua propia forte, coidada e ben tratada, a cultura do noso país caería nun pozo de difícil recuperación", engadiu.
Ademais, Caballero lamentou que a Xunta non incorpora proxectos "suficientes" para "facer da crise" da Covid-19 "unha oportunidade" para que o sector cultural "recupere" terreo a niveis anteriores á pandemia "e mesmo da crise do 2008".
Dito isto, o líder dos socialistas galegos apelou a un "galeguismo inclusivo" que promova "que os nenos amen o galego para que amen Galiza".
Pola súa banda, a secretaria de Cultura do PSdeG, Noa Díaz, encargada de presentar o acto, puxo o foco nas "poucas" mulleres ás que se lle dedicou o Día das Letras Galegas desde a súa primeira edición en 1963, que precisamente tivo como protagonista a "a galega máis universal", Rosalía de Castro.
E é que, entre a padronesa e Xela Arias, tan só foron recoñecidas María Victoria Moreno (2017), María Mariño (2007) e Francisca Herrera (1987). "Estamos aquí para reivindicar que se recoñeza a máis mulleres nos próximos anos", proclamou Díaz.
