María Vitoria Moreno, a escritora eleita pola Real Academia Galega para conmemorar o Día das Letras Galegas 2018 e cuxo nomeamento xa fora adiantado por sermosgaliza.gal, naceu en Valencia de Álcantara (Cáceres) en 1941. O seu nome pasará á historia canda o de Rosalía de Castro (1963), Francisca Herrera (1987) e María Mariño (2007), as catro mulleres distinguidas co Día das Letras Galegas, máxima honra á que poden aspirar as creadoras e creadores da literatura galega.
Para Fina Casalderrey, académica e amiga da homenaxeada, “é unha cuestión de xustiza, non de cota”. “Hai moitas persoas merecentes desta honra, mais as mulleres tamén son persoas e é de xustiza, como escritora, novelista, narradora de LIX, pioneira na narrativa tanto infantil como xuvenil”, engade. Unha literatura infantil e xuvenil en eclosión que contaba coas plumas de Manuel María, Carlos Casares, Bernardino Graña ou Xohana Torres. E tamén coas da propia Fina Casalderrey e de Marilar Aleixandre. “Seguro que ela non diría síntome abrumada. Como se a estiver vendo, diría vale, penso que o merezo, sexa muller ou home, non e ningunha hipérbole”.
“María Vitoria foi unha estremeña que quixo, por vontade propia e por unha historia de amor con Galiza, a cultura galega e o galego, facerse de aquí”, explica a súa amiga, “foi chegar, en 1963, e poñerse á favor xa da causa”. A súa soltura, cóntanos, foi “absoluta”. Tanta que a levou a impartir uns cursos clandestinos de galego polos que lle foi retirado o pasaporte en 1975.
[Podes ler a información íntegra no Sermos Galiza 251, á venda na nosa loxa e nos quiosques e puntos de venda habituais no país]
