venres 30/10/20

Primeiro de maio poético en Mondoñedo

O domingo 1 de maio ten lugar en Mondoñedo outra edición do 'Mondoñedo é poesía' dentro das Festas das Quendas, un conxunto de actividades culturais onde se dan cita numerosos autores  como Darío Xohán Cabana, María Lado ou Antonio García Teijeiro.

mondonhedo
Presentación da programación

“Mondoñedo é poesía 2016” é un conxunto de actividades culturais enmarcadas na programación das tradicionais Feiras e Festas das Quendas, que se celebran desde 1541 (hai 475 anos).
Nesta terceira edición convócase, como nas anteriores, a numerosos autores e autoras (escritores, músicos, debuxantes, libreiros, críticos …) que participarán en diferentes propostas culturais a realizar nas rúas, prazas e espazos culturais da cidade de Mondoñedo ao longo das xornadas 30 de abril e 1 de maio.

“Mondoñedo é poesía 2016” incrementa nesta edición as actividades complementarias coa celebración da I ExpoLIBRO, que inclúe exposicións, obradoiros e recitais que culminarán o domingo, 1 de maio, co recital poético-musical.

O sábado 30 de abril ten lugar o 'Debuxando Mondoñedo' (Sketchcrawl Galicia, 2ª edición), onde debuxantes e pintores se xuntan nunha quedada para debuxar a vila e logo pendurar as obras nas redes sociais. Tamén haberá unha exposición fotográfica titulada “Mondoñedo sentimental (Vidas e paisaxes)”.

No marco da Expo-Libro terán lugar numerosas presentacións de libros que comezarán o sábado ás 12:00 h. cun pregón homenaxe á imprenta, a cargo de Antonio Reigosa. A xornada do sábado dedicarase pola mañá e pola tarde á presentación de títulos e autores mindonienses e mariñaos: Armando Requeixo, Maka Ledo, Pepe Peinó, Rita Morrigan, Patricia C. Beltrán, Jose Díaz, Paco Rivas, E. Cal Pardo, X. Ramón Fernández Pacios, Andrés García Doural e Isidro Fernández Villalba).

O domingo pola mañá será tempo de presentación de novidade editoriais, coas últimas producións de Mª José Fernández, Mª Xosé Lamas, Antonio García Teijeiro e Antonio Reigosa, e Darío Xohán Cabana e Amelia Outeiro. Tamén haberá un “Tendal de poesía” no Auditorio “Pascual Veiga” con instalación de traballos con poemas do alumnado dos centros escolares mindonienses.

Recitais

E xa pola tarde chegarán os recitais poéticos na Praza da Catedral, na do Concello, na de Jaime Cabot e no auditorio, nos que participarán poetas como Darío Xohán Cabana,  Antonio García Teijeiro,  María Lado e Lucía Aldao, Martiño Maseda, Mª José Fernández, Mateo Buján, Raúl Costas, Antía Juncal e Xosé Artiaga (proxeccións). Na parte musical estarán César Morán, Carmen Rodríguez Lage e o Coro “Mestre Pacheco”.
 

comentarios