Primeiro concerto-homenaxe a Narf en Boiro, estatua incluída

O vindeiro xuño terá lugar en Boiro a primeira homenaxe en forma de concerto ao músico Fran Pérez, Narf, no que ademais se inaugurará unha estatua na súa memoria. Non será a última. 

narf-pousada
photo_camera Fran Pérez, Narf, na Pousada das Ánimas

Moitos artistas lle teñen dedicado concertos desde o seu pasamento o pasado novembro, como a súa última compañeira artística Uxía, ou Jabier Muguruza, ou o último festival Cantos na Maré, no que o músico compostelán foi recordado de forma reiterada. Pero o primeiro concerto-homenaxe terá lugar o vindeiro 10 de xuño ás 21 horas na Pousada das Ánimas, o local de música ao vivo de referenza do Barbanza.

Nel participarán artistas chegados de diferentes puntos do globo, como o mozambicano Cheny Wa Gune, que ten compartido con el proxectos musicais, ou Joao Gentil desde Portugal; alén dos Chévere, compañía na que colaborou durante moitos anos, e outros artistas galegos como Uxía, Marcos Teira, Najla Shami, Guadi Galego, Ramón Orencio (Mr. Cool), Nastasia Zurcher, Barahúnda, Santi Araujo, Pepe Bao, Guillermo Cid ou Aida Beiroa

Suso Santamaría: "Para min era un exemplo, era un tipo que quería ir de perfil baixo, sempre quería pasar desapercibido, pero era un home de grandísimo talento"

A recadación da noite (tamén hai unha fila 0) servirá para sufragar os gastos da estatua que se colocará na rúa, xusto diante do local, a poucos metros da de Javier Krahe, outro amigo da Pousada das Ánimas a quen o seu dono quixo render homenaxe. Neste caso trátase dunha figura de bronce nunha postura ben recoñecible do artista: de pé e co puño en alto, acompañado pola súa guitarra e o seu amplificador. O autor da peza é o artesán de Ponteareas José Rocha. 

Suso Santamaría, dono e alma da Pousada, quere que esta estatua de Narf "siga creando a ilusión que causaba el coa súa música". "Fágoo porque me unía a el unha amizade, pero tamén porque lle tiña moita devoción e admiración", explica. "Uníannos os valores. Para min era un exemplo, era un tipo que quería ir de perfil baixo, sempre quería pasar desapercibido, pero era un home de grandísimo talento".