Estas son as obras gañadoras duns Premios Follas Novas que homenaxean Lydia Cacho, a libraría Númax e Ediciós do Castro

Redacción

23/abr./23 - 10:00 Actualizado: 23/abr./23 - 13:26

Seguinte

O sector do libro galego asistiu este sábado a unha das citas máis sinaladas no calendario. O Teatro Principal de Santiago de Compostela foi o escenario elixido para dar a coñecer as autoras e autores gañadores nas diferentes categorías dos Premios Follas Novas. Barroco, de Antía Otero, foi a obra máis recoñecida con dous galardóns, á mellor produción de Poesía e ao Libro Mellor Editado, mentres Eva Mejuto viu premiados dous títulos: Memoria diversa, na categoría de Divulgación, e A ladroa da Biblioteca de Meirás, en Literatura Xuvenil.

A actriz de Chévere Patricia de Lorenzo foi a encargada de conducir a gala, encarnando o seu personaxe das Fillas Bravas, Isaura. Contou coa participación musical do grupo Noar, segundo clasificado nos Premios Narf. Os premios Follas Novas están organizados pola Asociación de Escritoras e Escritores en en Lingua Galega (AELG), a Asociación Galega de Editoras (AGE) e a Fedración de Librarías de Galicia (FLG), co apoio do Concello de Santiago, a Deputación da Coruña, a Xunta da Galiza e CEDRO.

Outra das grandes protagonistas foi a autora mexicana Lydia Cacho, que recibiu un dos premios de honra, o que outorga a AELG, co obxectivo de recoñecer "o seu traballo sobre o feminicidio en Ciudad Juárez, polas súas investigacións sobre a prostitución infantil". O premio das librarías foi parar á Númax de Santiago, "unha libraría con inquedanzas, con curiosidade intelectual, con moitas actividades, e integrada nun espazo cultural cunha oferta leva de man cine e libros", mentres Ediciós do Castro foi elixida polas editoras galegas, que valoraron a "extraodinaria importancia histórica desta editoral que agora cumpriría sesenta anos". Recolleu este último premio Xosé Díaz, fillo do fundador da editorial, Isaac Díaz Pardo.

Henrique Alvarellos, presidente da AGE, realizou o discurso institucional en nome das tres entidades organizadoras e reclamou "un verdadeiro, transversal, sedutor e ben dotado Plan de lectura en galego". A lectura en particular e a cultura en xeral, dixo, "debe ser un eixo fundamental das políticas públicas, ao mesmo nivel que as políticas sanitarias, as educativas e as de servizos sociais".

A Galiza, lamentou Alvarellos, "segue á cola das comunidades lectoras do Estado español" e a ausencia deses recursos, precisou, "está a ser cuberta pola acción, moitas veces individual e altruísta, das persoas creadoras, das librarías que estenden o seu horario para dar acubillo a tantos actos, das editoras que organizan, organizamos, todo tipo de accións de activismo cultural, do gran labor dos clubes de lectura, das docentes, do persoal das bibliotecas...".

O xurado desta oitava edición estivo formado por Cristina Barbeito Vázquez, David Cortizo Conde, Antonio M. Fraga Allegue, Tensi Xesteira, Lucía Novas Garrido, Montserrat Pena Presas e Nuria Vilán Prado.