A Fundación Carlos Casares daba a coñecer este pasada segunda feira 20 de decembro o fallo do Premio Carlos Casares-Kristina Berg ao talento activo, que a entidade convoca anualmente en colaboración coa Deputación de Ourense.
O certame, que recoñece "o talento emerxente dunha persoa moza menor de 36 anos en calquera eido de coñecemento", foi nesta segunda edición para o fotógrafo Brais Lorenzo.
Lorenzo, nado en 1986, foi seleccionado polo xurado pola "sensibilidade da súa mirada fotográfica, a calidade artística das súas obras, e o respecto e compromiso social que transmite o seu traballo" segundo apunta o fallo que fixo oficial o xurado.
Ademais, o comité destacou a alta calidade de todas as candidaturas presentadas.
O xurado desta edición estivo formado por Cristina Pato, María Martinón-Torres, María Canosa, Fernando González "Gonzo", Xavier Casares, Patricia Torres Madureira e mais Cristian Fojón Caruncho, gañador da primeira edición do certame. O premio está dotado con 10.000 euros en metálico.
Fotoxornalista nacional e internacional
O autor, formado na Escola de Arte e Deseño Antonio Faílde de Ourense, colabora en varios medios de comunicación da Galiza, entre eles Nós Diario, e outros a nivel internacional como The Guardian, ademais de axencias de prensa como a Agence France-Presse (AFP) ou Associated Press (AP).
Na súa traxectoria profesional, conseguiu premios como o Ortega y Gasset, o premio de Xornalismo Xosé Aurelio Carracedo ou o POY Internacional, un programa de desenvolvemento profesional para xornalistas visuais, sen ánimo de lucro, do Instituto de Xornalismo Donald W. Reynolds de Missouri.
