A precariedade da música dixital

Cando os servizos de música en streaming comezaron a popularizarse hai xa máis dunha década semellaban un cambio para mellor para os artistas. Unha oportunidade de aproveitar as novas oportunidades de distribución que ofrecía internet, maior comodidade para os usuarios e unha forma de xerar un beneficio destas escoitas nun momento no que as descargas ilegais eran especialmente populares. Con todo, a día de hoxe as perspectivas son menos optimistas que entón, ante un sistema capaz de xerar uns ingresos récord que non chegan aos artistas independentes ou de pequenas discográficas, como a gran maioría do panorama musical galego, creando unha situación de precariedade musical da que alerta a propia Unesco. Un sistema inviable As plataformas de streaming funcionan mediante un sistema no que pagan aos artistas unha determinada cantidade por cada reprodución. Neste aspecto entran en xogo diferentes factores como o tipo de subscrición do usuario que está a escoitar e o seu prezo, a súa localización, os ingresos que se xeran por publicidade ou os acordos coas distintas discográficas. Ademais, se unha canción non se reproduce durante máis de 30 segundos non se contabiliza como unha reprodución, algo que na era TikTok de consumo rápido cada vez acontece con máis frecuencia. Ao mesmo tempo, toda a música que se escoita fóra de conexión tampouco se contabiliza a non ser que os usuarios se conecten polo menos cada 30 días. Con todo, hai datos actualizados do que pagan de media as principais plataformas. No caso de Spotify trátase de 0,0028 euros por cada reprodución, o cal significa que para gañar un euro serían precisas 360 escoitas e para recibir o equivalente ao soldo mínimo durante un mes farían falta 385.715 reproducións. Con todo, a plataforma que máis se emprega para escoitar música a día de hoxe non é Spotify, é YouTube. Neste caso cada reprodución págase a 0,00065 euros. Para gañar un euro fan falta 1.540 escoitas e para chegar ao soldo mínimo 1.661.540 reproducións cada mes. Mesmo para os casos de máis éxito da música galega semella este un sistema inviable. 'Terra' xerou a través de YouTube uns 4.680 euros no último ano, o equivalente ao soldo dun mes repartido entre as tres pandeireteiras. A canción 'Terra' de Tanxugueiras, un dos temas que acadou unha relevancia enorme tanto a nivel estatal como no internacional coa súa presencia no Benidorm Fest de 2022 para a súa candidatura a Eurovisión suma 7,2 millóns de reproducións no seu vídeo oficial en YouTube. Un éxito con poucos precedentes na música galega, que a través desta plataforma apenas xerou uns 4.680 euros ao longo do último ano, que repartido entre as tres pandeireteiras supón o equivalente ao soldo dun mes, todo sen ter en conta todos os custos que xerou a gravación da propia canción. Con todo, para a maioría dos artistas galegos estas cifras son aínda máis insignificantes. Unha realidade ante a que resulta evidente que os músicos non viven do streaming. O directo é a principal fonte de ingresos para os artistas. Con todo, a situación é tamén cada vez máis complexa para os artistas independentes, especialmente tras a pandemia e ante un panorama musical centrado cada vez máis nos festivais. Uns grandes eventos que acostuman a funcionar ata certo punto cun circuíto limitado de artistas que acostuman a repetirse ano tras ano nos distintos carteis sen deixar moito oco para novas propostas, coas que resulta máis difícil garantir a venda de entrada para públicos masivos. Ao mesmo tempo, as salas de concertos, principais escenarios para os artistas locais e emerxentes teñen cada vez máis dificultades para desenvolver a súa actividade. Fórmulas alternativas Ante esta situación hai outras formas de tratar de apoiar os artistas. A música gravada segue a ir máis alá do streaming. Os discos en formato físico seguen a editarse, se ben xa non son un obxecto de consumo masivo e van dirixidos máis cara a aquelas persoas que os queiran coleccionar ou para 'audiófilos' que prefiran escoitar as súas cancións en formatos analóxicos como o vinilo. Tanto os CD como os vinilos acostuman a xerar máis beneficios para os artistas que o streaming. Ademais, existen plataformas como Bandcamp, que permiten a compra e o streaming de arquivos de audio dixitais que transfiren a maior parte dos beneficios de maneira directa aos artistas. E a primeiros de cada mes celebran os 'Bandcamp Fridays', nos que a plataforma transfire a totalidade das compras realizadas durante ese día aos músicos. Unha iniciativa que xerou xa máis de 85 millóns de euros en beneficios directos para os artistas dende que comezou a pandemia. Iniciativas que amosan que hai fórmulas alternativas ao modelo Spotify.