Coa publicación dos dous primeiros volumes, Edicións Positivas inicia unha campaña de subscricións co fin de acadar implicación nun proxecto que pola súa dimensión supón un “magno esforzo” para a editora. As persoas que se subscriban á obra completa gozarán dun desconto do 21% do prezo en libraría.
No primeiro volume, “Agora” recolleranse algunhas pezas das cales aínda queda memoria polo seu paso polo escenario. Integral, Animaliños, Anxeliños!, Criaturas, Rastros e Saxo Tenor, inclúense nesta primeira entrega que achegará o público lector a algunhas das pezas dramáticas de Roberto Vidal Bolaño. Canda el, ás librarías chegará “Outrora”, con outras seis pezas clave na dramaturxia contemporánea galega: Mar revolto, A burla do galo, Doentes, As actas escuras, Días de Gloria e Agasallo de Sombras, que será o volume máis amplo da colección, con 475 páxínas.
Sae do prelo un proxecto en que Edicións Positivas leva tempo traballando, mesmo antes de que a Academia decidise a designación de Roberto Vidal Bolaño como autor homenaxeado no Día das Letras Galegas 2013. A Obra Completa publicarase en seis volumes de máis de 2.000 páxinas na súa totalidade, en que se recollen non só a súa obra dramática senón tamén as adaptacións (A ópera de a patacón, Percival e Os papalagui) e os textos non dramáticos de pensamento e audiovisual.
A editora que dirixe Paco Macías será o selo en que tamén sairá publicada a biografía de Roberto Vidal Bolaño en que está a traballar o seu fillo Roi Vidal.
