Xa lle acontecera o mesmo en 2016. Un tal Carlos Alberto Canay gañou o segundo premio dun certame de Guijuelo (Salamanca) cun texto idéntico ao seu poema. Daquela enterouse pola organización, que llo comunicou logo de decatarse do plaxio e de retirarllo ao falso autor. Casualmente o mesmo texto (traducido ao español dun poema orixinal en galego) gañou outro certame, o Cafetín Croché de El Escorial en 2012.
E agora a autora recibiu noticia doutro plaxio grazas a un poeta leonés -Antonio Manilla- que se enterou de que o mesmo individuo gañou un certame en Perú cun poema del e se puxo en contacto coa galega porque o segundo premio do mesmo certame -chamado Derrama-, asinado por unha tal Ana Cecilia Marín Arana, reproduce exactamente o mesmo poema da coruñesa.
"Ten o mesmo título e copia até as comas", explica Pedreira. "Polo que puidemos averiguar é unha práctica habitual dos dous, poden ser mesmo parella, acadaron moitísimos premios, e moitos deles retiráronllos. Foron denunciados ducias de veces en España e tamén en Perú, e mesmo lle retiraron o Premio Antonio Gala por plaxiar un libro enteiro".
Diante desta situación, a poeta pouco pode facer. O dereito internacional é complexo, ademais de custoso, "e eles saben o que fan, xogan con poemarios moi pequenos en premios tamén pequenos, que a nós non nos supoñen unha perda importante, polo que non nos paga a pena meternos a un xuízo internacional, pero para eles eses cartos ao cambio son moitos". Ademais, continúa a coruñesa, "é difícil demostrar en textos tan curtos a autoría. Si en unidades maiores, aí si que hai depósito legal e propiedade intelectual".
Emma Pedreira: "Estamos desprotexidas polas entidades que nos teñen que defender, así que polo menos queremos alertar da existencia destas conductas e tamén de ferramentas para combatelas"
"Todo isto paréceme absurdo, é que non mudaron nin sequera o título ou unha coma. No caso de Guijuelo cantou moito porque o presentou un home e é un texto feminista, con detalles eróticos claramente femininos", conta Emma Pedreira. "Supoño que son moi preguiceiros, ademais de danados da azotea, é unha cousa moi fácil de descubrir, abonda con entrar en Google. Teñen que estar fatal".
"Desprotexida"
A escritora acudiu a Cedro na procura de asesoramento pero atopou a calada por resposta. "Estamos desprotexidas polas entidades que nos teñen que defender, así que polo menos queremos alertar da existencia destas conductas e tamén de ferramentas para combatelas, para que as entidades convocantes as utilicen, como o propio Google ou moitas outras".
Pedreira amosou tamén nas redes sociais nos últimos días o seu desgusto, tamén coas reaccións dalgunhas persoas, que subestimaron a gravidade do asunto. Hoxe mesmo dicía así no seu perfil de Facebook: "Diríadeslle a alguén que lle roubaron o coche que iso é porque o seu coche mola moito? Ou que lle saquearon a casa que é polo seu bo gusto en decoración? Pois non digades máis que se alguén gaña un premio cunha obra plaxiada é dobre premio para a lexítima autora. Por favor, extrapolade o roubo da propiedade intelectual a algo material ou mesmo físico e comparade o dano. Que sorte! A min ninguén me rouba! Hai que foderse!".