Onte abriu ao público, no Museo de Belas Artes da Coruña, Picasso branco no recordo azul. Debuxando o futuro. A mostra, que fai parte da conmemoración internacional do cincuenta aniversario da morte do artista, exhibe até o 25 de xuño, unha selección de 120 pezas que rastrexan as pegadas que deixou na súa obra o período da súa infancia vivido na cidade.
Comisariada por Antón Castro, Malén Gual e Rubén Ventureira, coa coordinación xeral de Ángeles Penas, directora do Museo de Belas Artes coruñés, a exposición indaga nos temas e as variábeis iconográficas que deixou esta época no artista, así como "os conceptos ou a dimensión das súas ideas e as súas precoces experiencias coa linguaxe visual".
A Celebración Picasso 1973-2023 xira ao redor dunhas cincuenta exposicións e eventos que se celebran en institucións culturais de renome de Europa e América que, xuntas, abordan unha análise historiográfica da súa obra. A conmemoración permite facer balance das investigacións e interpretacións sobre a obra de Picasso, especialmente durante o simposio internacional que se celebrará no outono de 2023, coincidindo coa apertura do Centre d'études Picasso en París.
Picasso iniciou a súa formación académica e asumiu a súa condición de artista na Coruña, onde viviu entre 1891 e 1895. El mesmo consideraba que a súa infancia e primeira adolescencia foran cruciais para chegar a ser o que foi. Estes anos foron exhaustivamente estudados na exposición O primeiro Picasso. A Coruña 2015, na que se daba a coñecer, desde unha mirada diacrónica, toda a súa produción coruñesa.
Na exposición, póñense de manifesto as débedas que o creador ten con aquel período que xamais esquecería, talvez a única etapa formativa na que se sentiu feliz, fortalecido por un sentimento de liberdade e confianza en si mesmo. Ronald Penrose afirma que na Coruña xa "triunfara en relación ao seu pai e aos catorce anos estaba seguro das súas facultades e do seu criterio". Nos anos que viviu aquí foi descubrindo a cidade experimentando a través do debuxo: captou as rúas, os monumentos, as praias, os montes e as personaxes que supuxeron a orixe do artista que acabaría por definir o século estético máis convulso.
O título da exposición está extraído dun dos seus poemas, cuxos versos aluden ás cores azul e branca, que evocan unha marcada identidade coruñesa desde mediados do século XIX e que o propio Picasso chegou a identificar coa cidade.
