O Centro de Estudos Galegos John Rutherford da Universidade de Oxford (situado no Queen's College) está a coproducir -no marco das súas actividades culturais anuais- xunto con XOGA (Xove Ópera Galega-Galician Youth Opera), a peza 'O Arame', de Juan Durán e Manuel Lourenzo, que fora estreada en 2008 na Coruña e producida pola asociación Amigos da Ópera da Coruña.
Esta ópera será representada o 10 de xuño en Oxford en galego, con subtítulos en inglés proxectados sobre a escena. Grazas a esta estrea coñecemos tamén o proxecto XOGA, iniciativa da pianista -e directora musical do espectáculo- Tamara Lorenzo Gabeiras que nace coa intención de "reavivar óperas esquecidas, en concreto óperas en galego".
A obra está protagonizada pola soprano -tamén galega- Lorena Paz e polo barítono irlandés Malachy Frame, ademais dos bailaríns Fran Mangiacasale e Mary Sol Martín del Castillo. A directora é Cecilia Stinton.
A idea da ópera galega xurdiu do compositor Juan Durán, quen recurriu ao dramaturgo Manuel Lourenzo na procura dun texto. E este propúxolle unha adaptación da obra súa frustrada 'Camiñar polo arame cunha lata de cervexa' (publicada por Laiovento en 2005). Conta a vida de dous artistas ambulantes na fin das súas vidas camiñan cara a unha “Fisterra”.
![Fillas de Cassandra na gala aRi[t]mar 2023.](/asset/zoomcrop,480,270,center,center/media/nosdiario/images/2024/03/27/2024032717434116054.jpg)
