Obras de Castelao e outros pintores galegos na mostra da posguerra do Reina Sofía

Trátase de tres obras da serie 'Debuxos de negros' que Castelao pintara no ano 1939 durante a súa estadía en Cuba. Ademais, inclúense pezas de Maruja Mallo, Díaz Pardo, Manuel Colmeiro e Urbano Lugrís. 

El Bongocero
photo_camera Parte de 'El Bongocero', unha das obras de Castelao incluídas na mostra

'Campo cerrado. Arte y poder en la posguerra española. 1939-1953' é o título da exposición que onte 26 de abril se inaugurou no Centro de Arte Reina Sofía e que inclúe tres obras de Castelao. Trátase de tres debuxos da serie titulada "Debuxos de Negros" que Castelao pintara no ano 1939 con motivo da súa estadía en Cuba. 

A mostra, comisariada por Mª Dolores Jiménez-Blanco, tamén conta con outra obra do Museo de Pontevedra, a "Cabeza de Muller Negra" da pintora nada en Viveiro e coñecida polo nome artístico de Maruja Mallo. Esta obra, pintada en 1946 , fora adquirida polo Museo a comezos da década de 2000. As obras de Castelao son as tituladas 'El Bongocero', 'Ritmo Afro-Cubano' e 'El Billetero', e todas forman parte da Colección Permanente do Museo. 

'Campo Cerrado', que poderá visitarse no terceiro andar do Edificio Sabatini do Reina Sofía entre o 27 de abril e o 26 de setembro, é unha mostra que revisa a produción artística na posguerra española desde ópticas moi diferenciadas e incluíndo un gran número de artistas. Todas as obras seleccionadas nesta mostra están divididas en epígrafes temáticos. No caso das obras de Castelao e Maruja Mallo están incluídas no epígrafe 'Exilios'. Ademais, os debuxos do artista rianxeiro comparten sala na mostra con obra doutros pintores galegos como Luis Seoane, Isaac Díaz Pardo, Urbano Lugrís e Manuel Colmeiro.

A mostra inclúe perto de 1.000 pezas de máis de 200 autores, entre os que se encontran Joan Brossa, Picasso, Robert Capa, Joan Miró, Josep Renau, Chillida ou Joan Miró. 

Comentarios