A Academia Galega de Teatro organiza desde esta sexta feira e até o próximo domingo 21, no Pazo de Mariñán, as I Xornadas da Academia en Mariñán que, baixo o título de "A estabilidade na acción teatral" e co patrocinio da Área de Cultura de Deputación da Coruña, xuntará especialistas e profesionais para que analicen as claves dun dos aspectos máis demandados polos profesionais dos diferentes oficios que conforman a escena galega: a estabilidade, tanto laboral como creativa.
Nas xornadas examinaranse diversos elementos que concorren na consistencia e solidez do sistema teatral galego, como as dificultades e carencias na programación dos espazos dedicados a exhibición, os problemas para organizar a itinerancia dos espectáculos ou o estado actual das redes e circuítos de distribución.
Igualmente, serán sometidos a escrutinio o papel das institucións na consecución da estabilidade, a plurianualidade da actividade teatral ou a propia estabilidade artítica e laboral das compañías teatrais.
Finalmente, os académicos deitarán a súa mirada sobre a experiencia das compañías residentes, fixándose especialmente na comarcalización da actividade teatral e nas experiencias realizadas en diversas residencias teatrais.
A Academia ten entre os seus obxectivos fomentar o desenvolvemento das artes e as ciencias relacionadas co teatro recoñecendo e dando a coñecer a profesionalidade e excelencia artística e tendendo pontes entre as diversas visións do teatro galego.
Tamén se propón difundir o teatro na sociedade, propiciando intercambios interculturais e internacionais, creando servizos dedicados ao estudo e investigación da interacción entre o teatro e as novas tecnoloxías e desenvolvendo actividades tendentes a elevar o nivel artístico, técnico ou científico dos distintos oficios teatrais.
