O novo Viñetas desde o Atlántico renóvase sen perder a súa esencia

Despois da alarma que xerou o ano pasado a dimisión de Miguelanxo Prado, alma mater dos primeiros vinte e cinco anos de Viñetas desde o Atlántico, o festival demostra que ten unha personalidade de seu e que a fórmula non dá síntomas de esgotamento. Ao contrario, é quen de reinventarse para prosperar e multiplicar as súas ramificacións. Despois dunha edición de transición na que todo o sector fechou filas para salvar o encontro, o autor coruñés Manel Cráneo asume a dirección do festival para ofrecer unha cita na que se poderá ver o traballo de máis de 40 autoras e autores galegos, 18 exposicións -13 individuais e colectivas de produción propia dentro da sección oficial, comisariadas pola dirección artística do festival, e outras 5 mostras paralelas organizadas por entidades colaboradoras-, máis de 100 sesións de sinaturas, unha vintena de editores de todo o Estado presentes na Coruña durante o evento e máis de 30 actividades na Rúa da BD, que contará cun total de 36 expositores. Ademais, disciplinas como o cinema, o teatro e a música, incorpóranse ao cartel de Viñetas 2024. "Tratamos de manter o espírito do festival, que sempre se caracterizou por ter un trato exquisito, e ao mesmo tempo familiar, cos invitados. Pero tamén é verdade que o tempo pasa, as tecnoloxías avanzan, e hai que adaptarse ao que está facendo a xente nova", declara Manel Cráneo en conversa con Nós Diario. A adaptación aos novos tempos da que fala o novo director de Viñetas pasa, por exemplo, por cambiar o formato das charlas que dará paso a novidosa serie de entrevistas coas autorías convidadas en formato Late Night Show que se desenvolverán no Teatro Colón. "Aí entramos no mundo do espectáculo, que sempre é máis dixeríbel para o público non especializado", apunta Cráneo. Ou por programar un ciclo de cine con filmes que adaptan algúns dos álbums dos autores convidados. "Black is Beltza II: Ainhoa, de Fermin Muguruza, ou Tungsteno, adaptación da novela gráfica de Marcello Quintanilha, son talvez os dous filmes que máis darán que falar, dúas obras moi completas e moi fieles aos cómics que as inspiraron". O que se recolle da experiencia colectiva do ano pasado é o "concerto debuxado" que inaugurará esta edición: a banda Sangre de Muérdago tocará o seu folk suave mentres Xulia Vicente e Sekone ilustran a música en directo. "En xeral, buscamos que o festival se integre aínda máis coa cidade", continua Cráneo, "para o cal probamos con iniciativas como o Viñetas Ñam! que nace como festival gastronómico no que varios restaurantes locais dedicarán un prato da súa carta a personaxes e series de cómic". Emma Ríos e David Rubín entre as firmas convidadas de Viñetas 2024 Exposicións de calidade A nova estrutura do festival en seccións que relacionan diversas disciplinas coa banda deseñada facilita que cada público atope o seu sitio máis doadamente. "Se, por exemplo, ves con nenos, tes o Viñetas Mini, onde vas atopar contacómics, obradoiros ou mesmo un concerto infantil", afirma Cráneo. "E en todas as seccións hai sorpresas. No Ágora, que é onde se localiza a parte dedicada á cativada, temos 'o cómic máis longo do mundo', a obra Alter·Nativo, de Jorge Campos, editado por Aira Editorial. Nun formato despregábel e sen palabras, é unha obra que explora dunha forma moi orixinal toda a mitoloxía popular sobre illas misteriosas". Mais tamén existe unha continuidade que se sostén principalmente nas exposicións. "A dirección de Miguelanxo Prado logrou que Viñetas fose respectado pola enorme calidade das exposicións, e nós quixemos manter ese sinal de identidade do encontro. O que si fixemos foi abrirnos un pouco máis á realidade internacional. Nos últimos anos o festival estaba moi centrado no cómic estatal e nós quixemos darlle unha volta e mostrar o que se está facendo en América Latina, onde se dan fenómenos moi interesantes que, ademais, se caracterizan por un gran compromiso social unha visión moi crítica sobre os acontecementos políticos que se están dando". Nomes como os dos arxentinos Lucas Varela ou Kundo Krunch, ou o do brasileiro Marcelo Quintanilha destacan nun programa que, por outro lado, tampouco esquece a creación galega. O Autobán da Coruña chega á súa décima edición BD galega "Temos uns corenta autores galegos presentes no encontro", detalla Cráneo. "Por un lado, está a exposición colectiva Toriyama en Galicia, que rende homenaxe ao autor de personaxes xa míticos do noso imaxinario como Son Goku ou Arale, da man dunha selección de autoras e autores galegos como Xulia Pisón, Paula Cheshire ou Miguel Robledo, que realizaron ilustracións debuxadas especialmente para esta mostra. Por outro, están as mostras dedicadas ás firmas gañadoras do Premio Castelao de Banda Deseñada 2023, Paula Mayor e Cristian F. Caruncho. E, ademais, por primeira vez, un personaxe de cómic dun autor galego, o Gaspariño de Xaquín Marín, súmase á colección de figuras que poboan a cidade durante o festival". E se iso fose pouco, a cita contará, ademais, coa exposición dos fanzines presentados ao I Premio Autobán ao Mellor Fanzine Galego, organizada pola Asociación Autobán, coa que se busca unha colaboración que aumente o abano de miradas galegas sobre a BD. "Hai unha mostra de fanzines que é unha verdadeira marabilla. Hai que pensar que se trata de autoras que traballan cunha liberdade artística que non ten a obra realizada para o mainstream. E as súas obras poderán lerse nunha zona de lectura situada no Palexco. Son obras que non son fáciles de atopar e creo que o público vai gozar moito con elas, pola súa creatividade e a súa audacia". Manel Cráneo está expectante ante a inauguración, malia que todo indica que a nova edición de Viñetas desde o Atlántico -que se estenderá desde o 12 até o 18 de agosto- marcará un fito na historia do festival. "Comezar desde cero e sen manual de instrucións non foi nada fácil", confesa o novo director de Viñetas. "Pero creo que conseguimos agrupar as vontades e os intereses do sector e dunha gran parte da cidadanía. Veremos agora o resultado, pero o que si creo é que hai un gran nivel en todas as propostas", conclúe.