Inventarios é unha das obras que Mabel Rivera levou á escena con Teatro do Malbarate en 1990. Inventarios foi tamén a peza teatral coa que tres novas actrices, recén egresadas da ESAD, homenaxearon na biblioteca do Consello da Cultura á actriz Mabel Rivera, a quen a Comisión de Igualdade dedicou a súa xornada anual na que recoñece o labor dunha muller nun determinado ámbito de actuación.
A interpretación de Melania Cruz, Beatriz Campos e Sheila Fariña das tres mulleres da obra de Philippe Minyana conseguiu emocionar no fin da xornada a Mabel Rivera. A obra dirixida por Cristina Domínguez, tres emocionantes monólogos, pechaba unha xornada dedicada a actriz e fixo abrollar as bágoas de Rivera que foron acompañadas polas das actrices que representaron a obra que ela protagonizara hai máis de vinte anos.
Pechábase así unha xornada na que, durante todo o día, a traxectoria da actriz e a situación do teatro foi debullada por especialistas e protagonistas da escena, con algúns dos nomes que teñen partillado con Rivera as últimas décadas do teatro galego. 
A homenaxe comezaba na sesión de tarde cunha entrevista á propia Mabel Rivera realizada pola xornalista Sandra Faginas na que a protagonista recoñeceuse, no seu papel de muller e actriz, como “o elo máis feble da cadea”. Rivera lamentou non ter “nai no artístico” e sinalou que a súa formación debíase a un “autodidactismo” inevitábel. “Autodidacta significa ser mestra dunha mesma, fíxádevos do que falamos, mestra de algo cando carezo de ferramentas” sinalou a actriz que repasou a súa traxectoria desde as orixes como traballadora de Astano.
A actriz comentou tamén o moito que lle custou tirar o mandil que lle puxo o personaxe de Balbina de “Pratos Combinados”. “Durante moitos anos ninguén tivo a percepción e que eu podía ser unha señora sen mandil”, dixo arredor dunha serie da que, segundo comentou, a TVG repetiu algúns dos seus capítulos até en 23 ocasións.
“As forza das herdeiras de Mabel Rivera é imparabel” sinalou Lara Rozados nunha das intervencións da tarde, antes de que as tres actrices ocuparan a Biblioteca do Consello da Cultura e Inma López Silva, en representación tamén de Dolores Vilavedra como coordenadoras das xornadas, recoñecera en Mabel Rivera a “mestra” dunha nova xeración de actrices e a “nai” teatral que ela, pouco antes, lamentou non ter tido.
Na xornada presentouse tamén a ampla cartografía na que se recollen un amplo conxunto de datos, imaxes e documentación arredor da traxectoria biográfica e artística de Mabel Rivera.
