sábado 24/07/21
Xurxo Lobato, fotógrafo

"A nosa lingua está en retroceso"

No VeñanMáis5 pulsamos esta sexta feira as opinións de Xurxo Lobato.

XurxoLobato2
XurxoLobato2

Se falamos de cultura galega non podemos deixar fóra a obra de Xurxo Lobato. Este fotógrafo da Coruña e membro da Academia Galega de Belas Artes recibiu no ano 2003 o Premio Ortega Gasset por unha fotografía emblemática da catástrofe do Prestige. Ten realizado numerosas exposicións individuais e colectivas entre as que atopamos Airiños Aires Rosalía e Rostros do país. Lobato organiza ademais o concurso fotográfico que leva o seu nome dirixido a mozos e mozas galegas de educación secundaria e FP.

-Como avalías o estado actual da cultura galega?
-Houbo un avance importante se miramos cara atrás. Nunca houbo tanta calidade na cultura galega feita coma hoxe. O idioma nunca tivo tanto recoñecemento oficial. Todo pola resistencia e perseveranza dos sectores con máis conciencia da galeguidade. Mais se miramos cara ao futuro, a lingua está en retroceso, non é útil, e a xente nova, e nas cidades, non a fala. É un problema que non se arranxa só con leis e decretos. Só cando teñamos orgullo de ser galegos, de ser nós no mundo, a cousa poderá cambiar. A cultura do País está na literatura, música, arte, audiovisual penso que con calidade homologada a outros países do entorno. Segue tendo un peso excesivo a escrita, ás veces parece que só a literatura é cultura. Neste aspecto a fotografía segue a ser esquecida e minusvalorada.

Sermos ten abrir as portas e ser un produto xornalístico pensado para que o lean a maioría dos galegos/as

 -Que evolución agardas da cultura galega a cinco anos vista?
-Na lingua son pesimista, non está a resistir a influencia do español e inglés. Non se percibe como útil e cada vez hai máis diferenza entre as cidades e as vilas no seu uso. Só é cultura galega a que se fai no idioma do país? Debemos reflexionar sobre este tema. Hai o caso irlandés. O futuro pasa por consumir cultura galega, sen complexos. Non pensar que polo feito de que sexa en español ou inglés vaia ser mellor. Ás veces si e outras, non. A maioría do país mira con receo o noso, hai que superar este complexo de inferioridade. Non só é cousa de axudas oficiais e política cultural, que tamén. A presión tan forte da cultura hexemónica anglosaxoa, que varre con todo e uniformiza... A TVG non é a telegaita, é a TV que fala de nós, ás veces gústanos e outras non, pero moito máis digna como TV que moitas xeneralistas españolas. E así máis casos… Pensar en exportar a nosa cultura, difundila, ensinar o que facemos. Gañar espazos no mundo. Internacionalizala. Isto influirá na percepción que teñamos. Se nos valoran fóra será mais fácil que nos valoren aquí.

-Que esperas de Sermos nos próximos cinco anos e en que cres que debemos e/ou podemos mellorar?
-Quero que sexa ademais dun medio escrito en galego e pensado en galego, que se converta no medio galego de referencia. Que abra as portas e sexa un produto xornalístico pensado para que o lean a maioría dos galegos/as. Que diferencie liña editorial e opinión da información. Que mire o mundo dende Galicia. A gran eiva é fotográfica, ten que mellorar a edición gráfica, profesionalizala.

comentarios