Nao, La Raíz ou Def con Dos para un Castañazo rock que agarda superar os 5.000 asistentes

O 29 de outubro, en Chantada, unha nova cita cun dos festivais obrigados do outono en Galiza, que dispón importantes novidades, como conexións con bus con varias cidades.

Centos encheron máis un ano o mercado gandeiro de Chantada no XI edición do Castañazo Rock
photo_camera Imaxe dunha edición anterior do Castañazo.

“Polo mes das castañas algo pasa en Chantada, terra brava” cantan os Liviao do Marrao, e abofé que si. Outono non sería outono no interior do país sen o Castañazo Rock, un festival que este ano fai a súa edición número XIV cun cartaza de luxo e importantes novidades. A música mantense como a aposta principal, con 7 propostas diferentes mais unidas por amosar ao vivo toda a súa potencialidade. A cita será o vindeiro 29 de outubro e or organizadores esperan reunir máis de 5.000 persoas.

Os históricos Def Con Dos son un dos pratos fortes desta edición. Rap, metal, sarcasmo e doses de mala hostia combínanse para facer tremer Chantada e contorna. La Raíz é outra das propostas, unha banda que está a ter un éxito importante en todo o Estado coa súa mistura de rock, reggae, ska...

Mais o cartaz deste ano é moito máis que estes dous nomes: Nao volve ao Castañazo e amosar por que é un dos grupos galegos do momento. Polo escenario de Chantada tamén pasarán Poetarras, Familia Caamagno ou Ezetaerre. E para pór o ramo, desde Euskal Herria, Esne Beltza, bailar e pensar.

Este ano, como novidade, dispoñeranse autocarros desde cidades como Compostela, Lugo ou Ourense. Para aqueles que se despracen ata Chantada e que prefiran quedarse até o día seguinte na vila terán a súa disposición os pavillóns do IES Val do Asma e CEIP Eloisa Ribadulla para acampar.

Ademais, e ao longo da xornada, o Castañazo infantil, os Cantos de Taberna ou os Xogos Bravú. O 29 de outubro, en Chantada, non se divirte quen non quere.


 

Comentarios