Este video foi publicado o ano pasado pola organización do FAP, o Festival Antrospinos que na última fin de semana de xullo leva a troula a Taragoña, en Rianxo. De todo o que prometen, estamos en condicións de acreditar que a boa música non ha faltar.
Do País tocarán grupos como Sacha na Horta, Chotokoeu, A compañía do ruído, Oito nun piso ou a Familia Caamagno. De fóra chegan Itaca Band, La troba kung-fu, Figli di Madre Ignota ou La gran orquesta republicana.
En total, doce bandas, dous picadiscos e "a grande matraquillada" compoñen o cartaz desta edición, a sexta, onde non faltarán tampouco un xantar popular e o traballo en prol da recuperación de espazos dos espazos públicos para a xente.
Malia que haberá actividades de balde para toda a familia, os concertos serán de pago: o bono para os dous días custa 10€ anticipado e 13€ na billeteira; o bono para días soltos custa 5€ anticipado e 9€ na billeteira. O programa previsto é o que segue:
- Sexta feira, a partir das 22h, tocarán Itaca Band, Sacha na Horta, La gran orquesta republicana e Figli di Madre Ignota. Pecha a xornada o picadiscos Bigote Mix
- Sábado ás 13.30h arrinca o xantar popular amenizado por Oito nun piso e De la Cruz Show. Ás 16h dará comezo a afamada e tradicional matraquillada e despois chegará a rumba canalla de Canijos sin Fronteras, unha banda que repite no festival. Ás 21h comezan os concertos: A compañía do ruído, La troba kung-fu, Familia Caamagno, Chotokoeu e A banda de Andrelo para pechar a xornada o picadiscos Hadri H
Até aquí o detallado resumo do programa musical que convertirá Taragoña na capital da troula do Barbanza durante esta vindeira fin de semana.