A música en galego pasa por un momento de saúde envexábel. Embora a perda de falantes e o retroceso do uso nas franxas máis novas da poboación, a vitalidade da música no noso idioma actualmente non está en dúbida. E non falamos de música tradicional ou cantautores. Cántase en galego en máis estilos ca nunca e hai todo un fervello de grupos e bandas a apostar na língua propia de Galiza como a súa.
Esta vitalidade vai poder ser partillada en Pontevedra da man do Galegote Rock, que vai decorrer entre o 25 e o 28 (maratón) de abril. Salas de música mais principalmente prazas e rúas van ser os escenarios onde poder gozar da ampla oferta desta edición.
Abrirá fogo o dúo Voodoo o día 25, tomando o relevo o trap de Boyanka Kostova o 26 de abril e os inclasificábeis Monoulios Dop o día seguinte, o 27.
O día grande vai ser o 28. Esa xornada toda Pontevedra vai sonar a música en galego. É a quenda de Son da Rúa, Cinta adhesiva, Espiño, Esposa, Ataque Escampe, The Lelly Kelly´s, Os Amigos dos Músicos e Dakidarría. E non faltarán DJs para poñer o ramo.
Ademais, haberá obradoiro de graffittis (coa temática xirando en torno á homenaxeada no Día das letras Galegas, María VictoriaMoreno).
