A COVID-19 xa forma parte do noso vocabulario e a corentena vai pesando... Mais a Cultura, nas súas diferentes manifestacións, é a que nos permite ir onde queiramos sen movernos da casa.
Sábeo ben a escritora Ledicia Costas, que segue recollendo os parabéns das lectoras pola súa novela Infamia (Xerais). Con ela emprendemos esta viaxe onírica a través da música.
Desesperadamente, de Amaro Ferreiro
"Escollo este tema porque é unha canción que entra directa na caixa do peito, agarra o corazón e elabora con el formas fascinantes, coma quen moldea un anaco de arxila. Tamén porque o seu último disco, Personajes Secundarios está a facerme compaña durante esta época tan estraña. É magnífico", di Ledicia.
Pyramids, de Frank Ocean
"É un tema que ten tantas capas que chega un punto que non sabes onde te vai levar. Intenso, sensual e fresco. Unha viaxe de adrenalina."
Cellophane, de FKA Twigs
"Pura poesía. FKA Twigs fai o que quere coa voz, pero neste tema chega a lugares imposibles. É esgazadora e tenra a un tempo. Unha viaxe interior que che deixa sen alento."
Laura Palmer’s Theme, de Angelo Badalamenti
"A terceira temporada de Twin Peaks é unha obra de arte, cunha banda sonora á altura do que requiría unha produción coma esa. Esta canción leva acompañándome moitos anos, mais agora ten para min un significado especial. Doe e reconforta a partes iguais."
Lump Sun, de Bon Iver
"Vernon compuxo o álbum For Emma, Forever Ago pechado nunha cabana nun bosque de Wisconsin. Illado do mundo, con recursos precarios e unha paisaxe interior absolutamente devastada polas propias circunstancias, creou esta marabilla. É insultantemente bela."
Lady, de Chromatics
"Cada canción de Chromatics semella un anacronismo. Os sintetizadores e a voz de Ruth Radelet fan unha especie de conxuro e, de súpeto, é coma se estiveses nunha discoteca de Portland nos anos 70. Ou correndo a través dunha rúa, nunha distopía de replicantes e neon."
Cuarentena sin ti, de Joe Crepúsculo
"Calquera que prema o play, saberá por que escollín esta canción: 'Ya no soporto esta cuarentena sin ti'."
Aquí a listaxe para escoitar todas as cancións: