Mulleres cineastas na mostra etnográfica do Museo do Pobo Galego

Etnografía, muller e cinema é o epígrafe que agrupa a maior parte de pezas obra de cineastas mulleres. Coordinado pola investigadora en artes visuais Ánxela Caramés, “reacciona ante o carácter androcéntrico dominante nas ciencias sociais e ante a dificultade das cineastas para ter un espazo propio no que recoñecerse”.

Unha directora libanesa, Feyrouz Serhal, responsábel de Tshweesh; outra israelí, Helen Yanowsky, que critica a limitación de movementos da poboación palestina en The boy from H2; e outra turca, Ebrû Avci, con Why is difficult to make filmes in Kurdistan, abrirán o ciclo. Que continuará cunha segunda sesión de curtametraxes, a cargo das galegas Xisela Franco -Cruz Piñón- e Olaia Sendón -Fisterra, carne de Safari- e mais de Estíbaliz Sádaba -Las filanderas.

A primeira longametraxe da tamén galega Diana Toucedo, Trinta Lumes -sobre o Courel- pechará Etnografía, muller e cinema.

Ademais desta, outra sección paralela, programada polo Cineclube de Compostela e de nome Trazas, tamén acollera cinema de mulleres. Por caso, Niced Coloured Girls (1987), da australiana Tracey Moffat, Doghter Rite (1978) de Michelle Citron, ou a mítica Trás-os-Montes (1976), de Margarida Cordeiro e António Reis.

Os programas paralelos da mostra do Museo do Pobo Galego complétaos Espiello, que recolle dous filmes premiados en Espiello, o Festival Internacional de Documental Etnográfica de Sobrarbe, en Huesca, “todo un referente internacional no ámbito do documental e a antropoloxía visual”. Os filmes serán Marquis de Wavrin, du manoir à la jungle, dos belgas Grace Winter e Luc Plantier, e China's 3Dreams, do australiano Nick Torrens.

Nota: cartaz da 13ª edición da Mostra Inetrnacional de Cinema Etnográfico do Muso do Pobo Galego.