PARA OS MÁIS NOVOS

A Mesa homenaxea Manuel María co libro-disco 'A voz do vento'

Xa está nas librarías 'A voz do vento', o libro-cd que vén de editar a Mesa pola Normalización Lingüística con poemas de Manuel María, cancións e ilustracións. Hoxe sábado 12 preséntase na Casa-Museo do escritor chairego. 

avozdovento

“É a homenaxe particular que lle queremos facer a Manuel María desde a Mesa”, cóntanos Marcos Maceira, presidente desta entidade: “A idea é difundir a obra deste poeta a través da música entre a xente máis nova”. 

O chairego “foi un escritor absolutamente comprometido con Galiza e co seu idioma”, salientou Maceiras, quen lembra que o autor era socio da Mesa. Neste proxecto “ponse música a poemas que van do intimismo ao compromiso a través de diversos estilos contemporáneos que pretenden chegar a todos os públicos mais dun xeito especial ao público xuvenil”.

O sábado ás 12 realízase a primeira presentación de 'A voz do vento' na Casa-Museo de Outeiro de Rei. O acto contará coa actuación musical de Fran Amil, e nel intervirán o secretario da Fundación Manuel María Alberte Ansede, o presidente da Mesa Marcos Maceira e Jano, ilustrador do libro.

O libro-cd inclúe poemas de Manuel María, música de Fran Amil e a tribo incomprensíbel e ilustracións de Jano. Os textos están extraídos dos libros: Terra Chá, Proba documental, Aldraxe contra a xistra, Cantos rodados para alleados e colonizados, Versos do lume e o vagalume, A luz resucitada, As lúcidas lúas do outono e Sonetos á casa de Hortas.

A tribo incomprensíbel está composta por Aarón Bouzón, Álex Bardanca, Fran Amil, Paco Cerdeira  e Ricardo Casás, pero tamén colaboraron coas súas voces Jasper, Paula Romero, Antón Díaz, Xurxo Souto, Belén Tajes, O Leo, M. J. Pérez e Xosé Antón Bocixa. Segundo sinalou o autor das músicas, Fran Amil, o libro-cd “é unha escolma de All Stars do país” e “unha especie de catálogo de historia pre-pos-bravú”. 

Na web da Mesa pódese escoitar un dos temas, 'Ollei misiles con radar'. 

Apoia Nós Diario

Se estás lendo de balde este xornal é grazas ás máis de 3.000 persoas subscritoras. A información independente ten un prezo. Apoia un xornalismo galego e sustentábel subscribíndote a Nós Diario ou facéndote mecenas.

comentarios