Matria xorde do interese do autor por Francisca Iglesias, que coidara do seu avó nos seus últimos anos de vida: “Chamábame a atención a súa persoa en si, o que había detrás dela e a relación que estabeleceu co meu avó. Facía da súa vida algo dinámico e pleno a pesar do que el tiña detrás”.
Director e protagonista comezaron a traballar xuntos no guión, primeiro para centralo na propia historia de Iglesias Bouzón e despois nunha segunda capa máis reivindicativa, que deu lugar á parte social e política da historia. “Aínda que todo emana dela e da súa forza”, subliña o director.
O compromiso do cinema
Para poder realizar este proxecto, Gago recompilou distintas lecturas sobre o falso mito do matriarcado en Galiza, co fin de contar “a realidade de moitas mulleres galegas”. Para o director, o compromiso social é unha compoñente esencial do cinema.
“Coido que o cinema é unha ferramenta que temos que utilizar para derrubarmos mitos estabelecidos e para loitar porque se conten todas as historias, tamén as do pobo, as que non saen nos libros. Matria narra a realidade de moitas mulleres galegas e non entendo o que fago sen ese compromiso”, salienta.
Para Álvaro Gago, o cinema debe estar perto da xente. Por iso, engade, convida a volver sacalo á rúa. “O cine xorde nunha primeira instancia como un pasatempo conectado á rúa e pouco a pouco ese matiz perdeuse. Agora facemos cinema de grandes dimensións, mais moi afastados da súa natureza”, explica.
O cineasta cualifica o actual panorama audiovisual galego como “efervescente”: “Hai anos que a nosa produción está a viaxar moitísimo a pesar da crise económica. Na última década reducíronse moito as axudas, pero a xente ten ganas de buscar a vida, ten talento e remata facendo cousas que se ven nos certames máis importantes do mundo”.
É o caso, menciona, de Carla Andrade, que presentará a súa curta -A paisaxe está baleira e o baleiro é paisaxe- no Festival de Rotterdam (un dos principais escaparates de cine independente a nivel mundial) ou Álberto Vázquez, preseleccionado para os Oscar por Decorado, unha curtametraxe de animación.
