En marcha a escolla dos Mestre Mateo

Até o 4 de febreiro, as socias da Academia Galega do Audiovisual escollerán as obras candidatas ás 25 categorías dos premios Mestre Mateo, entre un total de 160 producións presentadas.
Mestre Mateo
photo_camera Mestre Mateo

As socias da Academia Galega do Audiovisual escollerán, desde a segunda feira 20 de xaneiro até o vindeiro 4 de febreiro, as obras candidatas ás 25 categorías dos premios Mestre Mateo. Esta selección das finalistas terá lugar sobre a actual listaxe de inscritas, na que cada persoa académica emitirá catro votos por categoría a concurso.

Forman a preselección máis de 450 candidaturas, cun total de 160 obras, entre as que se atopan 5 longametraxes, 18 documentais, 4 series de televisión, 10 series web, 26 programas de televisión, 27 curtametraxes de imaxe real, 3 curtametraxes de animación, 25 anuncios publicitarios e 36 videoclips. Con todo, algunhas categorías xa están practicamente cubertas só cos presentados.

Por exemplo, a mellor curtametraxe de animación estará entre Elvis! (Daniel Rodríguez), Fratoj (Escola de Imaxe e Son de Vigo) e Homomaquia (David Fidalgo). O mesmo acontece coa categoría de serie de ficción, que enfrontará A Estiba (Voz Audiovisual e TVG), Hierro (Portocabo e Movistar+), Os Mariachi (Zopilote e TVG) e Serramoura (Voz Audiovisual e TVG). A mellor longametraxe deixará fóra só unha das cinco inscritas: Eroski - Paraíso (Jorge Coira), Feedback (Pedro C. Alonso), Longa Noite (Eloy Enciso), O que arde (Oliver Laxe) e Quen a ferro mata (Paco Plaza).

As bases estabelecen que cumpra un dos tres requisitos: que a versión orixinal sexa en galego; que, como mínimo, o 25% da produción corresponda a produtoras con domicilio social na Galiza, ou que o 50% do equipo técnico e artístico sexa galego ou residente na Galiza

Como se comproba das nomeadas, a lingua non é un criterio excluínte para optar aos Mestre Mateo. As bases estabelecen que cumpra un dos tres requisitos: que a versión orixinal sexa en galego; que, como mínimo, o 25% da produción corresponda a produtoras con domicilio social na Galiza, ou que o 50% do equipo técnico e artístico sexa galego ou residente na Galiza.

A academia galega é unha das poucas nas que as producións de cinema e televisión compiten en boa parte das categorías, como interpretación, documental, guión ou montaxe.

Comentarios