Máis de 45.000 'Caldos de Gloria' para Rosalía

Óscar Vidal, cociñeiro xefe de O Pazo Asador de Padrón, a primeira Estrela Michelín da Terra de Iria, é o cociñeiro que a Fundación Rosalía de Castro convida este ano a facer o Caldo de Gloria -a iniciativa inspirada no poema "Miña casiña, meu lar" na que a poeta explica como facer un caldo humilde e no que se relata a épica diaria da supervivencia- co que se celebra o Día de Rosalía. Unha iniciativa á que se unen cada vez máis sectores da cidadanía: desde tabernas e restaurantes até persoas que celebran Rosalía na intimidade dos seus fogares, pasando polas entidades e institucións que fan da elaboración do caldo unha festa colectiva. "Este ano xa se sumaron máis de 200 hostaleiros e máis de 70 comedores escolares", explica Anxo Angueira, presidente da Fundación Rosalía de Castro, en conversa con Nós Diario, "ademais de concellos e empresas de toda a Galiza. Repartíronse máis de 45.000 manteis de papel co poema que inspirou esta iniciativa, 'Miña casiña, meu lar'". A Fundación presentou onte o programa de actividades previstas para este día e, ademais do convite a todo o país a facer o seu propio Caldo da Gloria nas súas casas e nos restaurantes, e que o acompañen coa lectura dos poemas da escritora, haberá unha axenda de actos oficiais repartidos entre Santiago e Padrón, lugares de nacemento e pasamento da homenaxeada, respectivamente. Manifesto da AELG no Día de Rosalía de Castro 2023 Actos en Padrón e Santiago A celebración comezará ás 10 horas coa lectura de poemas por parte do alumnado do Instituto Camilo José Cela diante da Estatua de Rosalía, en Padrón. De aí, os festexos trasladaranse a Santiago, onde ás 11 horas -cos Carapaus e ofrenda floral na praza de Vigo, perto de onde naceu Rosalía hai 186 anos- terá lugar a Alborada para Rosalía de Castro, outro dos eventos que a fundación estabeleceu como un dos fitos desta celebración. O acto central decorrerá ás 12 horas, no Hostal dos Reis Católicos, na praza do Obradoiro, onde se realizará unha lectura de poemas seguida dunha actuación dos Carapaus, que tocarán acompañados de Estela Pereira e Lía Ferrer, alumnas da Escola Municipal de Música de Santiago. Xa pola tarde, a Casa de Rosalía volverá acoller a sétima edición do Caldo de Gloria da man de Óscar Vidal, que ofrecerá a súa versión da famosa receita de Rosalía aos presentes. O broche final a un día de celebracións poñerao a cantante e compositora Belém Tajes cunha actuación no auditorio da Casa-Museo ás 20 horas. Festival Rosalía, dúas xornadas para celebrar o 'súper poder' do galego Un avatar como guía Unha das novidades deste ano é que tamén se tomará o Caldo de Gloria "nas outras dúas lareiras do Rexurdimento", en palabras de Angueira: na Casa-Museo de Curros Enríquez, en Celanova, e na Fundación Eduardo Pondal de Ponteceso. A presentación aproveitouse para anunciar o lanzamento dunha nova aplicación que permitirá desde hoxe visitar de forma virtual a Casa de Rosalía, tendo por guía un avatar en tres dimensións de Maruxa Villanueva, a actriz galega que durante 30 anos coidou do que fora o fogar da poeta. "É outra das novidades que a min, como presidente da fundación, me emociona especialmente", confesa Angueira. "Calquera persoa dunha certa idade, lembrará Maruxa facendo de cicerone na Casa da Matanza. E isto, como sempre, permite que Rosalía exerza de ponte entre xeracións, que una o máis clásico co tecnoloxicamente máis desenvolvido". "Polo que estamos vendo, a celebración volverá ser multitudinaria por todo o país, malia coincidir nunhas datas complicadas pola coincidencia co Entroido", di Angueira. Sagrario Abelleira: "A luz de Rosalía é inmensa. Cando te achegas a ela, irrádiate" As claves do éxito Se o pensamos ben, resulta algo extraordinario que milleiros de persoas se unan un día para celebrar a vida e a obra dunha poeta. Mais isto é o que acontece na Galiza desde hai anos, con gran suceso, para honrar unha figura cuxo simbolismo vai moito máis alá da literatura. "O achegamento da xente moza á figura de Rosalía foi, sen dúbida, unha das chaves para o éxito que acadou a efeméride", lembra Angueira. "Cando comezaron a espallarse vídeos, memes e mensaxes polas redes sociais que mostraban moitas versións desprexuizadas de Rosalía, logrouse que a festa se fixese visíbel, que se expandise a celebración". Podemos lembrar, por exemplo, a imaxe warholiana que deseñou a empresa Rei Zentolo, que se espallou de forma case inmediata por todas as partes mostrando unha Rosalía viva, acorde coa mentalidade contemporánea. "Claro, é que o discurso de Rosalía é perfectamente actual, e ten a capacidade de unir xeracións", afirma o presidente da Fundación Rosalía. "Léndoa decatámonos da enorme vixencia dos seus escritos, da potencia revolucionaria e crítica que ten a súa obra. Fala de maltrato cara ás mulleres, de desafiuzamentos, de emigración, da desigualdade... É imposíbel abordar os seus poemas e non sentir que está describindo os males da nosa sociedade. E date de conta de que se trata dunha contestación encabezada por unha muller, algo insólito no seu tempo. Como non vai sentir empatía con ela a xente moza!". Angueira non esquece a mobilización dunha parte da sociedade que, de forma organizada, loitou por refrendar e lexitimar a data: desde a Asociación de Escritoras e Escritores en Lingua Galega, que insistiu durante anos na oficialización da data, "até multitude de asociacións culturais de base e, especialmente, o inmenso traballo feito desde o ensino, desde docentes que ás veces defenderon esta festa en condicións case heroicas". E remata lembrando que "o Día de Rosalía é unha festa absolutamente democrática argallada de abaixo a arriba, desde o pobo".