Despois dunha primeira edición na que se saldou unha débeda histórica coa música galega, e dunha segunda e terceira nas que se se consolidou o certame (incorporando os Premios Organistrum para recoñecer o labor da industria, reacomodando as datas e sumando categorías importantes); esta cuarta edición supón o asentamento definitivo dos Premios Martín Códax da Música, con 449 proxectos inscritos, un máis que na anterior edición. Desta volta, ademais, as bases non permitían presentarse aos premiados na pasada edición. Unha vez máis, foron cubertas todas as categorías, o que demostra, segundo o voceiro de Músicos ao Vivo, Ramón Bermejo, "o indiscutible potencial e diversidade musical de Galicia e afianza a MAV como a casa común dos músicos galegos."
Ademais das 16 categorías musicais, novamente as salas, festivais e espazos de comunicación musicais, cómplices imprescindibles das músicas e músicos galegos, ven tamén recompensado o seu importantísimo labor a través dos Premios Organistrum. Bermejo asegura que o balance non podía ser máis positivo: 386 grupos, 17 salas, 24 festivais e 21 medios de comunicación inscritos, e engade que “esta cuarta edición do certame pasará á memoria como a edición da asentamento: os Premios Martín Códax da Música chegaron para quedarse e para visibilizar a música que se fai no país”.
A organización admite tamén que categorías como Tradicional e Música de Verbena non reflicten a riqueza e a inxente cantidade de proxectos deste tipo que existen no país
A categoría de rock volve ser a máis numerosa con 68 inscritos. Ademais, destaca tamén a categoría de pop/indie con 47 proxectos. O que dá boa mostra do excepcional momento que vive Galiza nestes estilos, con propostas moi orixinais e de calidade internacional.
En canto ao resto de categorías cómpre salientar o bo momento da Canción de Autor con 39 inscritos e os 34 de Músicas do Mundo, o que da unha idea da diversidade de estilos feitos en Galicia. Séguenlle 28 en Folque e 25 en Jazz, estilos cunha gran traxectoria e seguemento no país. Con 21 proxectos están as categorías de Blues/Funk/Soul, Clásica e Electrónica. O Metal galego amosa a súa forza con 19 inscritos; a Música Infantil quédase en 13; e con 11 proxectos atopamos 3 categorías (Hip Hop, Tradicional e Reggae/Ska/Mestizaxe). Por último, presentáronse 10 proxectos en Coros e Grupos vocais, e 8 en Orquestras/Grupos/Música de Verbena.
Desde a organización recoñecen que os inscritos son só a punta do iceberg, e que en Galiza faltan moitos proxectos musicais por saír á luz. Admiten tamén que categorías como Tradicional e Música de Verbena non reflicten a riqueza e a inxente cantidade de proxectos deste tipo que existen no país; e animan a todos os que formen parte deste tipo de proxectos a participar en vindeiras edicións.
Entran profesionais no xurado
Mediante un proceso de votación online e privado a través da web, as socias e socios de Músicos Ao Vivo escollerán entre o 6 e o 26 de marzo aos 3 finalistas de cada unha das categorías existentes, que se farán públicos o 6 de abril durante a Festa de Nomeados que se celebrará, como cada ano, nas Bodegas Martín Códax, en Cambados.
Como novidade, nesta edición, un xurado integrado por músicos e profesionais do sector decidirá os proxectos gañadores en cada unha das categorías, de entre os finalistas. O xurado, que tamén fará as súas escollas a través do sistema de votación online de Músicos ao Vivo, será secreto e os nomes dos seus integrantes non se farán públicos ata finalizar o proceso. Os gañadores coñeceranse o 3 de maio no transcurso da Gala de Entrega de Premios que terá lugar un ano mais no Pazo da Cultura de Pontevedra.
