Bota a andar como un espectáculo musical no que a imaxe ten unha especial relevancia. Luar na Lubre e a Orquestra Sinfónica poñen música ás invasións galegas en Irlanda no proxecto “Torre de Breogán”, un espectáculo que se estreará no Palacio da Ópera da Coruña os días 21 e 22 de xuño, antes de iniciar unha xira polo Estado Español e Europa. O proxecto inclúe tamén a produción dun CD e un filme que dirixirá Jorge Coira.
O espectáculo recrea a historia épica do mundo celta no que A Coruña, Galiza e Irlanda son especiais protagonistas a través da lenda dos Milesians, unha historia á que Luar na Lubre, xunto coa Orquestra Sinfónica, poñen agora banda sonora. Nani García foi o encargado dos arranxos e a dirección musical correspóndelle a Diego García. Nunha proposta na que a imaxe, os efectos visuais a iluminación teñen unha especial relevancia, a Franc Aleu (que ten traballado con La Fura Dels Baus) encargóuselle a escenografía e o deseño a Estefanía Cagigao.
Coa historia do "Libro das Invasións"
Baseado no Leabhar Ghabhala Eirean (Libro das Invasións), o documento que recolle a tradición oral irlandesa e que transcribiron monxes cristiáns do século XI, o espectáculo recría a invasión dos Milesios que chegaron á illa desde Brigantia, despois da viaxe de encontro de Ith, o fillo de Breoghán. A primeira visión que Ith tivera fora desde o cumio da Thor Breoghán, a torre que leva o nome de seu pai.
Desta viaxe mítica nace “Torre de Breogán”, un espectáculo polo que transitarán druídas, feitizos ou guerreiros na que a música evoca o son da épica do mundo celta.
