Presentación na Biblioteca Provincial da Coruña

Un libro en lembranza de Álvaro Cebreiro

Ás 11.30 horas desta cuarta feira ten lugar a presentación do libro Álvaro Cebreiro 1903-1956: caricatura, humorismo, ilustración, de Xesús Torres Regueiro, no día no que se cumpren 100 anos da súa primeira mostra na Coruña, na sede das Irmandades da Fala das que formaba parte.
alvarocebreiro
photo_camera Debuxo de Álvaro Cebreiro. (Foto: Culturagalega.org)

Na obra que agora se presenta, Xesús Torres Regueiro afonda na figura de Álvaro Cebreiro, "considerado un dos mellores caricaturistas galegos, que se dedicou tamén á viñeta humorística, ás estampas paisaxísticas a gouache ou témpera, á ilustración de libros e ao cartelismo".

Torres Regueiro destaca tamén que Cebreiro asinou xunto con Manoel Antonio o manifesto Máis Alá! en 1922 e foi dinamizador de publicacións e de intercambios coa cultura portuguesa.

Na presentación, acompañan o autor, o deputado de Cultura, Xurxo Couto e o cuñado de Cebreiro, Alfonso Posse.

Adaír García, premio de arte gráfica da Deputación

A obra 19.040671,98.198711, do mexicano José Adaír García, resultou gañadora do XV Premio Internacional Jesús Núñez de arte gráfica.

Este galardón está convocado pola área de Cultura da Deputación da Coruña. O xurado escolleu esta obra entre un total de 80, procedentes de 15 países distintos.

Da obra de Adaír García Sánchez, elaborada coa técnica de augaforte, o xurado destacou a “súa capacidade para a creación de micro narrativas gráficas, traballando con documentos onde a memoria e a lembranza se relacionan a través de linguaxes plásticas nunha sorte de arquivo visual”.

"Cun método de impresión tradicional, como o augaforte, o gravado convértese nunha extensión dos procesos de arquivo e a imaxe resólvese nun palimpsesto visual", comentan.

Comentarios