Por streaming desde Galiza, emigrantes de todo o mundo puideron participar esta segunda feira na presentación do libro “Vento e Chuvia” (Xerais), un acto no que participaron os autores Manuel Gago e Manuel Cráneo e o editor Manuel Bragado. Dábase tamén a circunstancia de que cada un dos “Manueles” interviña desde unha cidade distinta, Gago desde Compostela, Cráneo desde A Coruña e Bragado desde Vigo.
“Moita xente foi á emigración e a tecnoloxía permítenos ofrecerlle a cultura galega en directo”, comezou Manuel Gago unha presentación na que se admitían preguntas a través da súa páxina web, do facebook ou do correo electrónico.
A emisión por streaming do libro que nos achega á mitoloxía e aos deuses na Idade de Ferro afonda na especial natureza do proxecto e do seu auto, Manuel Gago, que leva anos dedicándose á difusión do noso patrimonio cultural mais tamén ao emprego das novas tecnoloxías da comunicación, en especial, no ámbito da cultura.
O editor Manuel Bragado falou dun libro “estendido” por medio dunha edición “híbrida” que ía máis alá do volume en papel, o que Manuel Gago ten defendido como proxecto “trasmedia” e que quedou de maneira especial á vista na presentación en streaming para a emigración. A través da páxina web pódese achegar ao universo creado arredor de Vento e Chuvia, desde propostas didácticas até a tenda con produtos para "fans".