A 36 edición da Semana Galega de Filosfía que decorre en Pontevedra baixo o título 'Filosofía e fronteira’ acolleu no Teatro Principal de Pontevedra o relatorio do psiquiatra e profesor da Universidade de Barcelona Joseba Achotegui.
Ao comezo do seu relatorio, Emigrar en situación extrema, Achotegui sinalou a importancia de poñer o foco nas e nos migrantes e non na migración, xa que non deixa de ser un construto moitas veces manipulábel. “É máis sinxelo achegarse a unha persoa que a un construto”, afirmou, e engadiu que os seres humanos somos bos emigrantes e seguramente esta capacidade nos diferencia como especie, salientando a adaptación do ser humano a todo tipo de contextos como vivir nos polos, no deserto e “proximamente no Espazo”, prognosticou.
Cada día esteamos a ler noticias sobre construción de novos muros
O profesor resaltou que os primates humanos xa foron migrantes como os Australopitecus hai 3.000.000 de anos, 2.000.000 o Homo Erectus e hai 100.000 anos o Homo Sapiens sapies. “É unha característica evolutiva como especie”, sinalou.
Lamentou que cada día esteamos a ler noticias sobre construción de novos muros, e reflexionou que os seres humanos non temos raíces, senón que temos pés que nos permiten movernos. Achotegui avogou por estudar como se vive a migración a día de hoxe a nivel psicolóxico, “nun momento no que é complicado atopar novos horizontes”.
