O Festival de Cans viviu esta cuarta feira a segunda xornada da súa XX edición, dedicando a súa programación ao cinema e a música do país, coa estrea do documental Florencio, o cego dos Vilares, un coloquio sobre o filme Matria cos seus protagonistas e un broche final cunha noite de actividades dedicada aos veciños da aldea, os grandes protagonistas do evento.
Un dos momentos estelares chegou a mediodía no Torreiro cun debate sobre o proceso de creación de Matria, o filme galego que está a triunfar nas salas de rodo o Estado con uns protagonistas moi unidos a Cans, como o director Alvaro Gago e a actriz María Vázquez.
Tamén se incorporou ao debate Eduardo Rodríguez Cuña “Tatán” e actuou como presentador o director do festival, Alfonso Pato.
Despois do coloquio tivo lugar tamén no Torreiro a sesión vermú Povarelo na que participaron as violinistas María Jorge, Aldara Souto, Begoña Riobóo e Antía Ameixeiras, xunto ao tamén violinista Carlos Quintá e ao músico Pancho Álvarez, que ademais é o director do documental Florencio, o cego dos Vilares. Ante un público moi animado tocaron varios temas do repertorio tradicional do propio Florencio.
A xornada desta quinta feira conta de novo cunha programación chea de propostas interesantes para todos os públicos. Destaca o coloquio que terá lugar a mediodía no Baixo de Carlos de Cans, que reunirá vinte e cinco anos despois da súa estrea ás actrices da emblemática serie galega Mareas Vivas. Pola tarde a activade desprazarase ao Porriño.
No Circulo Recreativo Cultural (17 horas) proxectarase a longametraxe Unicorn Wars, do director Alberto Vázquez e a partir das 20:30 horas terá lugar a apertura oficial do festival coa proxección da película Honeymoon, do director Enrique Otero, que contará coa asistencia do equipo do filme. A actuación de Paloma, tamén no Circulo Recreativo Cultural, pechará a xornada.
