'Cólico', de Guadi Galego e 'Quase Dança', de Cláudia Pascoal, mellores cancións de 2020 da Galiza e de Portugal

Os máis de cinco mil votos do público emitidos no certame aRi[t]mar Galiza e Portugal promovido pola Escola Oficial de Idiomas de Santiago de Compostela determinaron que as vencedoras polo mellor tema musical publicado na Galiza e en Portugal en 2020 son, de entre as 20 finalistas, Guadi Galego, con ‘Cólico’ e Cláudia Pascoal, con ‘Quase Dança’, respectivamente.

Os premios, xunto cos de poesía, e o do Embaixada da amizade galego-lusófona, entregaranse a artistas e poetas gañadores na Gala aRi[t]mar Galiza e Portugal 2021 en outono.
 
Os seguintes temas máis votados, nos segundos postos, foron os de Xoana (Galiza) por Anceios e Outras Línguas, de Bárbara Tinoco; e os terceiros Os D'Abaixo (Galiza) por Pasei pola túa porta e Miguel Araújo (Portugal) con A Incrível História de Gabriela de Jesus.
 
Segundo explicou o director da Escola Oficial de Idiomas, Gonzalo Constenla, o certame voltou xerar moi boas expectativas e contou coa participación popular máis alta de todas as edicións do certame.
 
Ademais das  comunidades educativas e sociais da Escola Oficial de Idiomas de Santiago de Compostela, participaron tamén as da Facultade de Filoloxía da USC, Instituto de Línguas e Ciências Humanas da Universidade do Minho (Braga), Conservatorio Profesional de Música de Santiago, Escola Oficial de Idiomas de Lugo, Escola Oficial de Idiomas de Pontevedra, Escola Oficial de Idiomas de Ferrol, Centro Cultural Portugués de Vigo-Instituto Camões, os centros do Ensino Português pelo Camões na Galiza e os Centros de Estudos Galegos de máis de 35 universidades do exterior, ben como centros de ensino secundario de fóra de Galiza en que se imparte galego.

A seguinte fase do certame consiste na escolla de poesías gañadoras, que se poderán votar desde mediados de abril até mediados de maio.

Ademais, o día 24 de abril, véspera da celebración da Revolución dos Caraveis portuguesa, darase a coñecer o premio especial do xurado á Embaixada da Amizade galego-lusófona, creado para galardoar aquelas persoas, iniciativas ou institucións que se teñan destacado por tender pontes de amizade entre Galiza e a Lusofonía.
 
aRi[t]mar é un proxecto didáctico-cultural, desenvolvido inicialmente pola Escola Oficial de Idiomas de Santiago de Compostela, que ten por obxectivo divulgar a música e a poesía galego-portuguesas actuais, e achegar a cultura e a lingua dos dous países, no marco do desenvolvemento da Lei Valentín Paz-Andrade para o aproveitamento do ensino do portugués e vínculos coa Lusofonía. 
 
Esta iniciativa fai parte da Rede da GaliLusofonia, "com os objetivos de juntar esforços, coordenar-se e cooperar na difusão de iniciativas encaminhadas a fomentar a nossa língua e cultura comuns no seu espaço natural, a Lusofonia, com grande potencial noutros campos como o económico e o institucional".