Galicia Escena Pro chega á súa décima edición como escaparate das artes escénicas

Compostela é nestes momentos o lugar onde se xuntan compañías de artes escénicas, distribuidores, programadores e, en xeral, todo os participantes nun sector que se agrupa agora para concertar acordos que fagan posíbel que os espectáculos de artes escénicas cheguen ao público. Veñen até aquí cun obxectivo: coñecer as propostas para a próxima temporada e pechar os contratos que conformarán a oferta escénica da vindeira temporada. Dezanove representacións e doce presentacións en formato pitching conforman o programa da feira do teatro Galicia Escena Pro, que comezou onte en Santiago. A Axencia Galega de Industrias Culturais (Agadic) informou de que confirmaron a súa asistencia ao evento máis de 180 axentes do sector -representantes de 75 feiras, festivais, circuítos e espazos culturais de dentro e fóra da Galiza e de máis de cen compañías galegas e empresas de produción e distribución de teatro, danza e circo-, o que converte esta edición nunha das que concita unha das maiores cifras de participación da súa historia. Na carteleira deste ano exhibiranse dezaoito espectáculos galegos e un dunha compañía de Madrid -Hasta que la muerte nos separe de Inconstantes Teatro- en virtude da colaboración co certame MADFeria de Madrid que, en contrapartida, mostrará o vindeiro 16 de xuño, nas Naves del Matadero, a peza de danza Tabú da compañía Colectivo Glovo. Fraga Iribarne sobe a escena O programa O Salón Teatro, o Teatro Principal, o Auditorio Abanca e a Fundación SGAE son os escenarios nos que se representarán os espectáculos seleccionados, que se estenden tamén ás prazas de San Martiño Pinario e Mazarelos con tres propostas de rúa. As pezas que se exhibiron na xornada de inauguración foron Crisálida de Caramuxo Teatro, Vaivén de Marcia Vázquez, A nai de Amorodio Teatro e Arraianos de Sarabela Teatro. Hoxe será a quenda de Solo de Roi Borrallas, Mosca de Ártika Cía., Bionic de La Guajira e Hamelin de Redrum Teatro. Na cuarta feira, 31 de maio, poderán verse Hasta que la muerte nos separe de Inconstantes Teatro, Alleo de Colectivo Glovo, Vestirme de ti de Furia Sotelo −que constitúe unha estrea absoluta no marco da feira−, Outrora nós de Mevadeus, Sofá de Marta Alonso Tejada Cía. e In-gobernable de Uxía Morán. Finalmente, na quinta 1 de xuño, Galicia Escena Pro programa Multiperspectivas #2 de Paula Quintas Cía., 3240 de DeuVe, Iphixenia na porta do súper de Compañía Humana, Backstage de NegroLópez e Unha inimiga do pobo de Talía Teatro. O público xeral pode acudir a estar funcións previa retirada de convite no Centro Obra Social Abanca. O resto da programación de Galicia Escena PRO diríxese exclusivamente aos profesionais acreditados, entre os que se atopan programadores de teatros, auditorios, salas e festivais, así como representantes de empresas produtoras e distribuidoras. As propostas que se avanzaron onte nas presentacións breves de Galicia Escena Pro, por outra parte, foron Anöa de Elvi Balboa, Compaña de Xampatito pato, Kyoki de Elefante Elegante, Monstros de Producións Teatrais Excéntricas, Nanai da China de Pérez &amp; Fernández, Perder a lingua de Eva Comesaña e X de Fran Sieira, Compañía de Danza. O día 31, presentaranse Birds on Wire de Pistacatro, Deadpan Karaoke de Ibuprofeno Teatro, Entrega en man de Contraproducións, Frío de A Feroz e Iribarne de ButacaZero. Unha comedia 'denegrida' de Martin MacDonagh abre a Mostra de Cangas Edición pospandemia Desde que Escena Galega -a Asociación Galega de Empresas de Artes Escénicas- se responsabiliza da coorganización de Galicia Escena Pro, a feira apela á interacción persoal, dándolle protagonismo á figura da facilitadora -desenvolto este ano por Eva Triñanes-, unha coordinadora que pon en contacto a programadores e compañías e que xestiona encontros entre profesionais para propiciar intercambios. Neste sentido, volverá contarse co Centro Obra Social Abanca como sede profesional do encontro, onde se desenvolverán máis de 400 reunións de traballo entre programadores e representantes de compañías, produtoras e distribuidoras. "En realidade, esas 400 citas son as que están formalizadas previamente, pero a medida que se desenvolve o encontro, acaban sendo máis", explica Santiago Cortegoso, presidente de Escena Galega. Mais a gran novidade deste ano é o abandono completo das restricións derivadas da pandemia. "Aínda o ano pasado non podiamos facer funcións para infantís coa cativada como público, o que desnaturalizaba un pouco esas representacións. Este ano, por fin, xa podemos contar con público escolar. E tamén recuperar as sesións de pinchos, que sempre axudan a estreitar relacións e a estimular un mellor coñecemento entre os axentes que participan da feira". A democracia fronte ás súas contradicións Inxerencias políticas nas programacións escénicas Galicia Escena Pro comezou a ser coorganizado por Escena Galega en 2019, co propósito de mellorar as relacións entre os diferentes axentes -algo ao que contribuíu en gran medida a aparición da figura da facilitadora- e de axilizar e rendibilizar a zona profesional. Porén, na Galiza a maioría das persoas programadoras dependen de concellerías. Até que punto inflúen as eleccións desta fin de semana nas programacións? "Os anos electorais sempre son estraños, constrúense programacións moi electoralistas, cheas de concertos, verbenas...", explica Cortegoso. Mais non queda aquí a influencia da política. Segundo o presidente de Escena Galega, "cada vez percibimos máis inxerencias do poder político. As persoas programadoras son as que nos coñecen, as que saben que clase de traballo realiza cada compañía. Mais se a concellería se empeña en supervisar o seu labor entorpecen e desfiguran os piares artísticos das programacións. Ademais de complicar moito a interlocución, porque resulta moi complicado concertar unha cita cun político, explicarlle os fundamentos da proposta artística... En xeral, guíanse por uns parámetros que son máis electoralistas que artísticos. E iso sucede cada vez máis, e independentemente das cores políticas". As ameazas á infancia, no escenario